നിലമ്പൂര്‍: മെഡിക്കല്‍ ബന്ദിന്റെ ഭാഗമായി നിലമ്പൂര്‍ ജില്ലാ ആശുപത്രിയിലെ ഡോക്ടര്‍മാരുടെ സമരത്തില്‍ ഓട്ടോറിക്ഷാ തൊഴിലാളി യൂനിയന്‍ പ്രതിഷേധിച്ചു. ഏതാനും മാസം മുന്‍പ് ആശുപത്രിയിലെ വിവിധ പ്രശ്‌നങ്ങള്‍ പരിഹരിക്കണമെന്നാവശ്യപ്പെട്ട് നിവേദനം നല്‍കാനെത്തിയ ഓട്ടോറിക്ഷാ തൊഴിലാളി യൂനിയന്‍ നേതാക്കള്‍ക്കെതിരെ പരാതി നല്‍കുകയും പൊലിസ് കേസെടുക്കുകയും ചെയ്തിരുന്നു. ആശുപത്രി പരിസരത്ത് സമരം നിരോധിച്ചുവെന്ന് കാരണം പറഞ്ഞാണ് ആശുപത്രി മാനേജ്‌മെന്റ് കമ്മിറ്റിയും സൂപ്രണ്ടും ചേര്‍ന്ന് പരാതി നല്‍കിയത്. എന്നാല്‍ ഇന്നലെ ഡോക്ടര്‍മാര്‍ തന്നെ ആശുപത്രിക്കു മുന്‍പില്‍ സമരം നടത്തിയത് എച്ച്.എം.സിയുടെ നിയമത്തിന് വിരുദ്ധമാണെന്നും ഇതിനെതിരെ എച്ച്.എം.സിക്ക് പരാതി നല്‍കുമെന്നും തൊഴിലാളികള്‍ പറഞ്ഞു. റഹീം ചോലയില്‍, ടി.എം.എസ് ആസിഫ്, അഷ്‌റഫ് ബാവ, ടി.സുനില്‍ തുടങ്ങിയവര്‍ നേതൃത്വം നല്‍കി.