കൊണ്ടോട്ടി: കരിപ്പൂര്‍ വിമാനത്താവളത്തില്‍ ശിശുപരിചരണ മുറിയൊരുങ്ങി. കുഞ്ഞുങ്ങള്‍ക്കു മുലയൂട്ടാനും മറ്റും ഉപകാരപ്പെടുന്ന വിധമാണ് കുഞ്ഞുങ്ങള്‍ക്കും അമ്മമാര്‍ക്കുമായി പ്രത്യേക ഇടംതന്നെ വിമാനത്താവളത്തില്‍ നിര്‍മിച്ചത്. അന്താരാഷ്ട്ര ടെര്‍മിനലിലെ ആഗമന ഹാളില്‍ കസ്റ്റംസ് ഹാളിനോട് ചേര്‍ന്നാണ് പുതിയ ചൈല്‍ഡ് കെയര്‍ ഒരുക്കിയിരിക്കുന്നത്. യാത്രക്കാരുടെ ഭാഗത്തുനിന്നുള്ള നിരന്തര ആവശ്യവും ഇതുമായി ബന്ധപ്പെട്ട് ഉയര്‍ന്നിരുന്നു. ശിശു പരിചരണ മുറിയില്‍ കുട്ടികള്‍ക്കാവശ്യമായ കളിക്കോപ്പുകളും കൗതുകവസ്തുക്കളുമുണ്ടാകും. കുട്ടികളെ ഉറക്കുന്നതിനായി തൊട്ടിലും ഒരുക്കിയിട്ടുണ്ട്. 24 മണിക്കൂറും സേവനം ലഭ്യമാണ്. ഡയറക്ടര്‍ കെ. ജനാര്‍ദനന്‍ ഉദ്ഘാടനം ചെയ്തു. വിമാനത്താവളത്തില്‍ ആര്‍ട്ട് ഗാലറിയുടെ നിര്‍മാണവും പുരോഗമിക്കുന്നുണ്ട്.