ചങ്ങരംകുളം: ചൂണ്ടല്‍ കുറ്റിപ്പുറം സംസ്ഥാന പാതയില്‍ പന്താവൂര്‍ സെന്ററില്‍ കാറും ബൈക്കും കൂട്ടിയിടിച്ച് ഒരാള്‍ക്ക് പരുക്കേറ്റു. എടപ്പാള്‍ കുമ്പിടി സ്വദേശി അമ്പലത്തറ ജാബിറി (28) നാണ് പരുക്കേറ്റത്. ഇയാളെ തൃശ്ശൂരിലെ സ്വകാര്യാശുപത്രിയില്‍ പ്രവേശിപ്പിച്ചു. സുഹൃത്തിന്റെ വിവാഹത്തില്‍ പങ്കെടുത്ത് മടങ്ങവെ കഴിഞ്ഞ ദിവസം രാത്രി 11:30ഓടുകൂടിയാണ് വാഹനങ്ങള്‍ അപകടത്തില്‍പെട്ടത്. രാത്രി ഏറെ വൈകിയതും സമീപത്ത് അധികം ആളില്ലാതിരുന്നതും ആളെ തിരിച്ചറിഞ്ഞ് ബന്ധുക്കളെ വിവരം അറിയിക്കുന്നതിന് തടസമായി. കാര്‍ നിര്‍ത്താതെ പോയതിനാല്‍ പരുക്കേറ്റയാള്‍ ഏറെ നേരം റോഡരികില്‍ കിടക്കേണ്ട സ്ഥിതിയുണ്ടായി. തുടര്‍ന്നെത്തിയ നാട്ടുകാരും പൊലിസും ചേര്‍ന്നാണ് ഇയാളെ ആശുപത്രിയില്‍ എത്തിച്ചത്.