കോട്ടയം: സി.പി.എം കോട്ടയം ജില്ലാ സമ്മേളനത്തോടനുബന്ധിച്ച് നടക്കുന്ന പ്രതിനിധി സമ്മേളനത്തിന്റെ രണ്ടാംദിവസം പാര്‍ട്ടിയിലെ തലമുതിര്‍ന്ന നേതാവായ വി.എസ് അച്യുതാനന്ദനെതിരേ പ്രതിനിധികളുടെ രൂക്ഷവിമര്‍ശനം. അതേസമയം, പാര്‍ട്ടിയുമായും എല്‍.ഡി.എഫുമായും അടുപ്പത്തിന് ശ്രമിക്കുന്ന കെ.എം മാണിയോട് സമ്മേളന പ്രതിനിധികള്‍ മൃദുസമീപനം കൈക്കൊണ്ടു.
ഇന്നലെ നടന്ന ചര്‍ച്ചയിലാണ് പ്രതിനിധികള്‍ വി. എസിനെതിരേ ആഞ്ഞടിച്ചത്. കഴിഞ്ഞ നിയമസഭാ തെരഞ്ഞെടുപ്പ് കാലയളവില്‍ പൂഞ്ഞാറില്‍ പ്രചാരണത്തിനെത്തിയ വി.എസ് അച്യുതാനന്ദന്‍ എല്‍.ഡി.എഫ് സ്ഥാനാര്‍ഥിയോട് മോശമായാണ് പെരുമാറിയത്. സ്ഥാനാര്‍ഥിയുടെ മുഖത്ത് നോക്കാന്‍ പോലും വി.എസ് തയാറായില്ല. ഇത് മണ്ഡലത്തിലെ പ്രവര്‍ത്തകരുടെ ഊര്‍ജം കെടുത്തി. വി.എസിന്റെ പെരുമാറ്റം എതിരാളികള്‍ തെരഞ്ഞെടുപ്പില്‍ രാഷ്ട്രീയമായി ഉപയോഗിച്ചതായും പ്രതിനിധികള്‍ കുറ്റപ്പെടുത്തി.
അതേസമയം, കേരളാ കോണ്‍ഗ്രസ് (എം)നെ എല്‍.ഡി.എഫിന്റെ ഭാഗമാക്കണമെന്ന് പ്രതിനിധികള്‍ ആവശ്യമുന്നയിച്ചു.
ജില്ലയില്‍ പാര്‍ട്ടിക്ക് കുടുതല്‍ സീറ്റുകള്‍ സ്വന്തമാക്കാന്‍ മാണിയുമായുള്ള ബന്ധം ഗുണം ചെയ്യും. കേരളാ കോണ്‍ഗ്രസുമായി ബന്ധമുണ്ടാക്കാന്‍ നിലവിലെ അനുകൂലസാഹചര്യം പ്രയോജനപ്പെടുത്തണമെന്നും പ്രതിനിധികള്‍ അഭിപ്രായപ്പെട്ടു. കോണ്‍ഗ്രസിനെയും ബി.ജെ.പിയെയും ദുര്‍ബലപ്പെടുത്തണമെന്ന പാര്‍ട്ടി കോണ്‍ഗ്രസ് തീരുമാനം മാണിയുടെ കാര്യത്തില്‍ സ്വീകരിക്കണം. ദീര്‍ഘകാല അടിസ്ഥാനത്തില്‍ മാണിയുമായുള്ള കൂട്ടുകെട്ട് കോട്ടയത്തടക്കം മധ്യകേരളത്തിലെ അഞ്ച് ജില്ലകളില്‍ നേട്ടം സമ്മാനിക്കും. സി.പി.ഐയേക്കാള്‍ മധ്യകേരളത്തില്‍ മാണി ബന്ധം കൂടുതല്‍ ഗുണം ചെയ്യും. ജില്ലയിലെ ഏറ്റവും വലിയ പാര്‍ട്ടിയാണെന്ന് റിപ്പോര്‍ട്ടില്‍ പറയുമ്പോഴും ഒരു എം.എല്‍.എ മാത്രമാണുള്ളത്. പുതിയ കൂട്ടുകെട്ടുണ്ടായാല്‍ ഇതിനൊക്കെ മാറ്റമുണ്ടാവും.
പ്രതിപക്ഷത്തിന്റെ ജോലിയാണ് സി.പി.ഐ ഇപ്പോള്‍ ചെയ്തുകൊണ്ടിരിക്കുന്നത്. ഇത് സര്‍ക്കാരിന്റെ പ്രതിച്ഛായ നഷ്ടത്തിനും സര്‍ക്കാരിന്റെ പ്രവര്‍ത്തനങ്ങളെ പിന്നോട്ടടിപ്പിക്കാനും ഇടയാക്കി. സ്വന്തം ജന്‍മസ്ഥലത്ത് പത്തുപേരെ അണിനിരത്താന്‍ കഴിയാത്ത കാനം രാജേന്ദ്രന് സി.പി.എമ്മിനെ വിമര്‍ശിക്കാന്‍ എന്തു യോഗ്യതയാണുള്ളതെന്ന് വിമര്‍ശനമുയര്‍ന്നു.