കൊണ്ടോട്ടി: ഖാസിയാരകം-ചീനിക്കല്‍ തോട് സ്ലാബിട്ട് മൂടാനും 40 വര്‍ഷത്തിന് നാലുലക്ഷം രൂപക്ക് പാട്ടത്തിന് നല്‍കാനും മുന്‍ പഞ്ചായത്ത് ഭരണ സമിതി സ്വകാര്യ വ്യക്തികള്‍ക്ക് നല്‍കിയതായി കണ്ടെത്തി. മാനദണ്ഡങ്ങള്‍ മറികടന്നാണ് കുറഞ്ഞ തുകക്ക് പാട്ടത്തിന് നല്‍കിയതെന്നത് പ്രതിഷേധത്തിനിടയാക്കിയിട്ടുണ്ട്.
അങ്ങാടിക്ക് സമീപത്തു തന്നെ കെട്ടിടങ്ങള്‍ക്കിടയിലുള്ള സ്ഥലം ഇത്തരത്തില്‍ പാട്ടത്തിന് നല്‍കിയതും ആരുമറിഞ്ഞിട്ടില്ല.വാഹന പാര്‍ക്കിംഗ് പ്രശ്‌നങ്ങള്‍ സങ്കീര്‍ണമായ കൊണ്ടോട്ടിയില്‍ ഇത് വന്‍ പ്രതിഷേധത്തിനിടയാക്കിയിരിക്കുകയാണ്.
അങ്ങാടിയില്‍ ഓട്ടോറിക്ഷകള്‍ക്കും ടാക്‌സികള്‍ക്കും പോലും പാര്‍ക്കിംഗിന് സൗകര്യമില്ലാതിരിക്കുമ്പോഴാണ് സ്വകാര്യ കച്ചവടക്കാര്‍ നടപ്പാതയില്‍ വാഹനങ്ങള്‍ പാര്‍ക്ക് ചെയ്യുന്നത്.
സ്വകാര്യ വ്യക്തികള്‍ കൈയടക്കുന്ന നടപ്പാത എല്ലാവര്‍ക്കും ഉപകരിക്കുന്ന രീതിയിലേക്ക് മാറ്റാന്‍ നഗരസഭ തയാറാകണമെന്നാണ് നാട്ടുകാരുടെ ആവശ്യം.
എന്നാല്‍ സംഭവം മുന്‍ പഞ്ചായത്ത് ഭരണസമിതിയുടെ കാലത്താണ് നടന്നതെന്നും നഗരസഭക്ക് ഇതില്‍ യാതൊരു ബന്ധവുമില്ലെന്നും നഗരസഭ സ്ഥിരസമിതി ചെയര്‍മാന്‍ അഡ്വ.കെ.കെ സമദ് പറഞ്ഞു.