മുംബൈ: രാജ്യാന്തര വിപണിയില്‍ അസംസ്‌കൃത എണ്ണവില 31 മാസത്തെ ഉയര്‍ന്ന നിലവാരത്തിലെത്തി. ബാരലിന് 67.29 ഡോളറിന് മുകളിലാണിപ്പോള്‍. എണ്ണ വിലയിലുണ്ടായ കുതിച്ചുകയറ്റം ഇന്ത്യന്‍ എണ്ണക്കമ്പനികളെ ആശങ്കപ്പെടുത്തുന്നുണ്ട്.
ഒരു വര്‍ഷത്തിനിടെ 40 ശതമാനമാണ് അസംസ്‌കൃത എണ്ണവില കൂടിയത്. 2016 നവംബര്‍ അവസാനം ബാരലിന് 48 ഡോളറായിരുന്ന വിലയാണ് 67.29 ഡോളറിന് മുകളിലെത്തിയിരിക്കുന്നത്.
ഉല്‍ജപാദനം കുറയ്ക്കാന്‍ ഒപെക് തീരുമാനിച്ചതാണ് വിലകൂടാന്‍ പ്രധാനകാരണം. ഇതിനുപുറമെ എണ്ണ ഉല്‍പാദക രാജ്യങ്ങളിലെ രാഷ്ട്രീയ അസ്വസ്ഥതകള്‍, ആഗോള ആവശ്യം മുതലെടുത്ത് എണ്ണ ഉല്‍പാദക രാജ്യങ്ങളില്‍ ഉള്‍പ്പെടാത്ത ചില രാജ്യങ്ങള്‍ എണ്ണ വില വര്‍ധിപ്പിച്ചത് എന്നിവയാണ് രാജ്യാന്തര വിപണിയില്‍ അസംസ്‌കൃത എണ്ണ വില വര്‍ധിക്കാന്‍ കാരണം.
വിലകുതിക്കാന്‍ തുടങ്ങിയതോടെ രാജ്യത്തെ എണ്ണക്കമ്പനികള്‍ കടുത്ത സമ്മര്‍ദത്തിലായിട്ടുണ്ട്. കമ്പനികളുടെ ലാഭത്തെ വിലവര്‍ധന കാര്യമായി ബാധിക്കുമെന്ന ആശങ്ക ശക്തമായിട്ടുണ്ട്. അസംസ്‌കൃത എണ്ണ വില ഉയരുന്നത് പെട്രോള്‍, ഡീസല്‍ വിലയില്‍ കാര്യമായ വര്‍ധനക്ക് ഇടയാക്കും.
ക്രൂഡ് ഓയില്‍ വില കുതിച്ചതോടെ ബോംബെ സ്റ്റോക് മാര്‍ക്കറ്റില്‍ ഓയില്‍ ആന്റ് ഗ്യാസ് സൂചികയിലെ എണ്ണക്കമ്പനികളുടെ ഓഹരികള്‍ നേട്ടത്തില്‍ പിന്നിലായി. ഇന്ത്യന്‍ ഓയില്‍ കോര്‍പ്പറേഷന്‍, ഹിന്ദുസ്ഥാന്‍ പെട്രോളിയം കോര്‍പ്പറേഷന്‍ തുടങ്ങിയ കമ്പനികളുടെ ഓഹരികള്‍ കഴിഞ്ഞ മൂന്നുമാസത്തിനിടെ നഷ്ടത്തിലായപ്പോള്‍ ഭാരത് പെട്രോളിയം കോര്‍പ്പറേഷന്‍ മാത്രമാണ് പിടിച്ചുനിന്നത്. .
2018 അവസാനത്തോടെ എണ്ണവില ബാരലിന് 80 ഡോളറിലേക്ക് ഉയര്‍ന്നേക്കുമെന്നാണ് വിലയിരുത്തപ്പെടുന്നത്.