ചെന്നൈ: ദിനകരന്‍പക്ഷത്തേക്കുള്ള എം. എല്‍. എ. മാരുടെ കൂറുമാറ്റത്തെതുടര്‍ന്ന് തമിഴ്‌നാട് മുഖ്യമന്ത്രി ഇ. പളനിസാമി സര്‍ക്കാറിന്റെ ഭാവി തുലാസില്‍. ഈ മാസം 8ന് നിയമസഭാ സമ്മേളനം ചേരാനിരിക്കെ അണ്ണാ ഡി.എം.കെ. ഔദ്യോഗികപക്ഷത്തെ എം.എല്‍.എ.മാരുടെ പിന്തുണ ഉറപ്പിക്കാന്‍ ഇന്നലെ രാവിലെ റായപേട്ടയിലെ പാര്‍ട്ടി ആസ്ഥാനത്ത് വിളിച്ചുചേര്‍ത്ത എം.എല്‍. എമാരുടെ യോഗത്തില്‍ രണ്ട് മന്ത്രിമാര്‍ ഉള്‍പ്പെടെ 9 എം.എല്‍. എ. മാരുടെ അസാന്നിധ്യം ഔദ്യോഗിക പക്ഷത്തെ അങ്കലാപ്പിലാക്കി. മുഖ്യമന്ത്രി ഇ. പളനിസാമി, ഉപമുഖ്യമന്ത്രി ഒ. പനീര്‍ശെല്‍വം എന്നിവരുടെ സാന്നിധ്യത്തില്‍ നടന്ന യോഗത്തില്‍ മന്ത്രിമാരായ കടമ്പൂര്‍ രാജു, ചെല്ലൂര്‍രാജു എന്നിവരും, എം. എല്‍. എ. മാരായ ആറുക്കുട്ടി, പൗണ്‍രാജ്, പ്രഭു, ഭാസ്‌കര്‍ , ശിവസുബ്രഹ്മണ്യം, ഗീത എന്നിവരാണ് പങ്കെടുക്കാതിരുന്നത്. 113 എം. എല്‍. എ.മാരില്‍ 104 പേര്‍ പങ്കെടുത്തുവെന്നാണ് പാര്‍ട്ടി നേതൃത്വം വ്യക്തമാക്കിയത്.
നിയമസഭാസമ്മേളനത്തില്‍ ഒട്ടേറെ വിവാദ വിഷയങ്ങളാണ് സര്‍ക്കാരിനെ കാത്തിരിക്കുന്നത്. ദിനകരന്‍ പക്ഷത്തെ 18 എം.എല്‍.എമാര്‍ക്ക് സ്പീക്കര്‍ അയോഗ്യത കല്‍പ്പിച്ചിട്ടുണ്ട്. ഇത് സര്‍ക്കാരിന് ഭീഷണിയായി അവര്‍ കാണുന്നില്ലെങ്കിലും ദിനകര പക്ഷത്തേക്ക് എം.എല്‍.എമാര്‍ കൂറുമാറിയേക്കുമെന്ന ആശങ്കയിലാണ് മുഖ്യമന്ത്രി.
ഡി.എം.കെക്ക് 98 എം.എല്‍.എമാരും മൂന്ന് സ്വതന്ത്രരും ദിനകരനും ഉള്‍പ്പെടെ ഇപ്പോഴത്തെ പ്രതിപക്ഷ നിരയില്‍ അംഗസംഖ്യ 102 ആയിട്ടുണ്ട്. ഭരണപക്ഷത്തെ ചിലരെ ചാക്കിട്ടുപിടിച്ചാല്‍ അത് സര്‍ക്കാരിന്റെ വീഴ്ചക്ക് കാരണമാകുമെന്ന ആശങ്ക പളനിസാമിക്കും പനീര്‍ശെല്‍വത്തിനുമുണ്ട്. സര്‍ക്കാരിന്റെ ആയുസ് മാര്‍ച്ച് വരെ മാത്രമെന്ന് ആര്‍.കെ നഗര്‍ തെരഞ്ഞെടുപ്പ് വിജയത്തിന് പിന്നാലെ ദിനകരന്‍ പ്രഖ്യാപിച്ചിരുന്നു. അതിനിടയില്‍ ഔദ്യോഗിക പക്ഷത്തു നിന്ന് ചില എം.എല്‍.എമാര്‍ ദിനകരപക്ഷത്തേക്ക് മാറിയേക്കുമെന്ന് ഇന്റലിജന്‍സ് വിഭാഗം സര്‍ക്കാരിന് മുന്നറിയിപ്പ് നല്‍കിയിട്ടുണ്ട്.
ഈ സാഹചര്യത്തില്‍ ദിനകരനെ എതിര്‍ക്കാതെ സമന്വയത്തില്‍ സര്‍ക്കാരിനെ സംരക്ഷിക്കാനും ഭരണപക്ഷ നിരക്ക് മുഖ്യമന്ത്രി രഹസ്യ നിര്‍ദേശം നല്‍കിയിട്ടുണ്ടെന്നാണ് വിവരം.
പാര്‍ട്ടിയുടെ ഔദ്യോഗിക പത്രമായ നാമതു എം.ജി.ആറും, ജയ ടി.വിയും ദിനകരന്റെ കൈപ്പിടിയിലായ സാഹചര്യത്തില്‍ അണ്ണാ ഡി.എം.കെ പുതിയ പത്രവും ചാനലും തുടങ്ങാന്‍ തീരുമാനിച്ചിട്ടുണ്ട്.