ലണ്ടന്‍: വര്‍ഷാവസാനത്തില്‍ നടന്ന പോരാട്ടത്തില്‍ 18 തുടര്‍ വിജയങ്ങള്‍ക്ക് സമനില കുടുങ്ങി വിരാമമിടേണ്ടി വന്നെങ്കിലും പുതുവര്‍ഷത്തിലെ ആദ്യ മത്സരത്തില്‍ തന്നെ മാഞ്ചസ്റ്റര്‍ സിറ്റി വിജയം സ്വന്തമാക്കി അപരാജിത മുന്നേറ്റം തുടരുന്നു. സ്വന്തം തട്ടകത്തില്‍ വാട്‌ഫോര്‍ഡിനെ ഒന്നിനെതിരേ മൂന്ന് ഗോളുകള്‍ക്കാണ് സിറ്റി പരാജയപ്പെടുത്തിയത്. കളിയുടെ ഒന്നാം മിനുട്ടില്‍ തന്നെ സ്റ്റെര്‍ലിങിന്റെ ഗോളില്‍ ലീഡെടുത്ത സിറ്റിക്ക് വാട്‌ഫോര്‍ഡിന്റെ വക സെല്‍ഫ് ഗോളും ലഭിച്ചു. മൂന്നാം ഗോള്‍ സൂപ്പര്‍ താരം സെര്‍ജിയോ അഗ്യെറോയാണ് വലയിലാക്കിയത്.
മറ്റ് മത്സരങ്ങളില്‍ ടോട്ടനം എവേ പോരാട്ടത്തില്‍ മറുപടിയില്ലാത്ത രണ്ട് ഗോളുകള്‍ക്ക് സ്വാന്‍സീ സിറ്റിയെ വീഴ്ത്തി. ലോറെന്റെ, അലി എന്നിവര്‍ വല ചലിപ്പിച്ചു. ഡേവിഡ് മോയസിന്റെ വരവില്‍ പുത്തനുണര്‍വ് നേടിയ വെസ്റ്റ് ഹാം യുനൈറ്റഡ് സ്വന്തം തട്ടകത്തില്‍ 2-1ന് വെസ്റ്റ് ബ്രോംവിച് ആല്‍ബിയോണിനെ പരാജയപ്പെടുത്തി. ഒരു ഗോളിന് പിന്നില്‍ നിന്ന ശേഷമാണ് വെസ്റ്റ് ഹാമിന്റെ മടങ്ങിവരവ്. മത്സരം സമനിലയില്‍ അവസാനിക്കുമെന്ന് തോന്നിച്ച ഘട്ടത്തില്‍ ആന്റി കരോളിന്റെ ഇഞ്ച്വറി ടൈമിലെ ഗോളാണ് വെസ്റ്റ് ഹാമിന് വിജയമൊരുക്കിയത്. മറ്റൊരു മത്സരത്തില്‍ ക്രിസ്റ്റല്‍ പാലസ് 2-1ന് സതാംപ്ടനെ തോല്‍പ്പിച്ചു.