ദോഹ: നദീതടങ്ങള്‍ സാംസ്‌കാരിക കേന്ദ്രങ്ങളാണ്. സംസ്‌കാരം പുനഃസൃഷ്ടിക്കാന്‍ ഓരോ നദികള്‍ക്കും അതിന്റെ പേരില്‍ പ്രത്യേകം സംഘടനകള്‍ അനിവാര്യമാണെന്ന് പ്രമുഖ പരിസ്ഥിതി പ്രവര്‍ത്തകന്‍ സി ആര്‍ നീലകണ്ഠന്‍ അഭിപ്രായപ്പെട്ടു.

'ചാലിയാര്‍ ദോഹ' സംഘടിപ്പിച്ച പരിസ്ഥിതി സംഗമത്തില്‍ ചാലിയാര്‍ ദോഹ പ്രതിനിധികളുമായി സംവദിക്കുകയായിരുന്നു അദ്ദേഹം. നാടിന്റെ പച്ചപ്പ് സൂക്ഷിക്കുന്നത് പ്രവാസികളാണെന്നു പറഞ്ഞ അദ്ദേഹം ചാലിയാര്‍ ദോഹയുടെ വിവിധ പരിസ്ഥിതി പ്രവര്‍ത്തനങ്ങളെ പ്രത്യേകം അഭിനന്ദിക്കുകയും ചെയ്തു.

കേരളത്തിന് ആവശ്യമില്ലാത്ത ഗെയ്ല്‍ ഗ്യാസ്‌ലൈന്‍ പദ്ധതി യാതൊരു സുരക്ഷാ മുന്‍കരുതലുകളുമില്ലാതെയാണ് നടപ്പാക്കാന്‍ ശ്രമിക്കുന്നതെന്ന് ഒരു ചോദ്യത്തിനുത്തരമായി അദ്ദേഹം പറഞ്ഞു. ഈ പദ്ധതി തികച്ചും വ്യവസായികാവശ്യത്തിനാണ്, മറിച്ചുള്ള വാദങ്ങളെല്ലാം അടിസ്ഥാനരഹിതമാണ്.

ജനങ്ങളുടെ സുരക്ഷിതത്വത്തിനു മുന്‍ഗണന നല്‍കിയുള്ള സംരംഭങ്ങളാണ് അഭികാമ്യമെന്നു അടുത്തിടെ ആന്ധ്രയില്‍ നടന്ന വാതക പൈപ്പ് ലൈന്‍ പൊട്ടിത്തെറി ചൂണ്ടിക്കാട്ടിക്കൊണ്ട് അദ്ധേഹം പറഞ്ഞു.

ചാലിയാര്‍ ദോഹ പ്രസിഡണ്ട് മഷ്ഹൂദ് തിരുത്തിയാട് മോഡറേറ്റര്‍ ആയിരുന്നു. സി ആര്‍ നീലകണ്ഠന്റെ പാരിസ്ഥിതിക പ്രവര്‍ത്തനങ്ങള്‍ക്കുള്ള അംഗീകാരമായി ചാലിയാര്‍ ദോഹ ഉപഹാരം ഷൗക്കത്തലി ടി എ ജെ നല്‍കി. ജനറല്‍ സെക്രട്ടറി അബ്ദുല്‍ ലത്തീഫ് ഫറോക്ക് സ്വാഗതം പറഞ്ഞു. ചടങ്ങില്‍ ഹൈദര്‍ ചുങ്കത്തറ, ബഷീര്‍ കുനിയില്‍, സുബൈര്‍ വി പി , കേശവദാസ് നിലമ്പുര്‍, മനാഫ് എടവണ്ണ, നൗഷാദ് പി പി സി , ഷാനവാസ് സി പി , രഘുനാഥ്, അലി അക്ബര്‍, കോയക്കുട്ടി, ജെബിന്‍ എന്നിവര്‍ സംസാരിച്ചു. സിദ്ധീഖ് വാഴക്കാട് നന്ദിയും പറഞ്ഞു.