ന്യൂഡല്‍ഹി: മലേഗാവ് സ്‌ഫോടനക്കേസില്‍ അന്വേഷണ ഉദ്യോഗസ്ഥര്‍ പിടികിട്ടാപുള്ളികളെന്നു വിശേഷിപ്പിച്ച രണ്ട് പ്രധാന പ്രതികളും ഒരുമുഖ്യസാക്ഷിയും കൊല്ലപ്പെട്ടതായി വെളിപ്പെടുത്തിയ മഹാരാഷ്ട്ര ഭീകരവിരുദ്ധ സേനയിലെ (എ.ടി.എസ്) മുന്‍ ഇന്‍സ്‌പെക്ടര്‍ മഹ്ബൂബ് മുജാവറിന്റെ മൊഴി എന്‍.ഐ.എ രേഖപ്പെടുത്തി. കേസിലെ പ്രധാനപ്രതികളായ രാംജി കല്‍സാംഗ്രെ, സന്ദീപ് ഡാംഗെ എന്നിവരും മുഖ്യസാക്ഷി ദിലീപ് പതിദറും കൊല്ലപ്പെട്ടെന്ന് മുജാവര്‍ വെളിപ്പെടുത്തിയിരുന്നു. ഇതുസംബന്ധിച്ച വിശദാംശങ്ങളാണ് അദ്ദേഹത്തില്‍ നിന്ന് മഹാരാഷ്ട്രയിലെ പ്രത്യേക എന്‍.ഐ.എ കോടതി തേടിയത്.
മുജാവറിനെ ചോദ്യംചെയ്തു വെളിപ്പെടുത്തല്‍ സംബന്ധിച്ച സ്ഥിരീകരണം തേടിയതായും ചോദ്യംചെയ്യലില്‍ തന്റെ പക്കല്‍ തെളിവുകളുണ്ടെന്ന് മുജാവര്‍ പറഞ്ഞതായും എന്‍.ഐ.എ വ്യക്തമാക്കി.