സുല്‍ത്താന്‍പൂര്‍: മോദിയുടെ നോട്ട് നിരോധനത്തെ രൂക്ഷമായി വിമര്‍ശിച്ചുകൊണ്ട് യു.പി മുഖ്യമന്ത്രി അഖിലേഷ് യാദവിന്റെ തെരഞ്ഞെടുപ്പ് പ്രചാരണത്തിന് തുടക്കം കുറിച്ചു. ഇന്നലെ വൈകുന്നേരം സുല്‍ത്താന്‍ പൂരിലാണ് അദ്ദേഹത്തിന്റെ തെരഞ്ഞെടുപ്പ് പ്രചാരണത്തിന് തുടക്കം കുറിച്ചത്.
പണം കറുത്തതോ വെളുത്തതോ എന്നതല്ല മറിച്ച് ജനങ്ങള്‍ നേരിട്ട ദുരിതമാണ് ഇവിടെ ചര്‍ച്ച ചെയ്യപ്പെടേണ്ടത്. നോട്ട് നിരോധനത്തില്‍ ജനങ്ങള്‍ നേരിട്ട ദുരിതം ചെറുതായിരുന്നില്ല, ജനങ്ങള്‍ കഠിനാദ്ധ്വാനം ചെയ്തുണ്ടാക്കിയ പണം പിന്‍വലിക്കാന്‍ കഴിയാത്തത് മോദിയുടെ തെറ്റായ സാമ്പത്തിക നയത്തിന്റെ ഫലമായിട്ടാണെന്നും അദ്ദേഹം ആരോപിച്ചു. മോദിയുടെ നല്ല ദിനങ്ങളെന്ന പ്രഖ്യാപനത്തിന്റെ യഥാര്‍ഥ വസ്തുതകള്‍ മനസിലാക്കാതെയാണ് പലരും അതിനെ അനുകൂലിച്ചത്. എന്നാല്‍ നല്ല ദിനങ്ങള്‍ വരണമെങ്കില്‍ ബി.ജെ.പി ഭരണത്തില്‍ നിന്നും പുറന്തള്ളപ്പെട്ടാല്‍ മാത്രമേ സാധ്യമാകൂ എന്നും അദ്ദേഹം വ്യക്തമാക്കി.