കോതമംഗലം: കനാല്‍ ശുചീകരിക്കാന്‍ തൊഴിലുറപ്പ് തൊഴിലാളികള്‍ക്കൊപ്പം സേവന സന്നദ്ധരായ നാട്ടുകാരും രംഗത്ത്. കനാല്‍ ശുചീകരണത്തിന് തൊഴിലുറപ്പ് തൊഴിലാളികളുടെ തൊഴില്‍ ദിനങ്ങളില്‍ അടുത്തിടെ കുറവു വരുത്തിയിരുന്നു. ഇതേ തുടര്‍ന്ന് കനാല്‍ ശുചീകരണം പൂര്‍ണമായി നടപ്പാക്കുവാനുള്ള തൊഴില്‍ ദിനങ്ങള്‍ ലഭിക്കാതെ വന്നു.
ഈ സാഹചര്യത്തിലാണ് ഇന്നലെ തൊഴിലുറപ്പ് തൊഴിലാളികള്‍ക്കൊപ്പം പിടവൂര്‍ സാധു സംരക്ഷണ സമിതിയുടെയും ഡി.വൈ.എഫ്.ഐയുടെയും പ്രവര്‍ത്തകര്‍ സംയുക്തമായി കനാല്‍ ശുചീകരിക്കാന്‍ തയ്യാറായത്.
മൂവാറ്റുപുഴ വാലി ജലസേചന പദ്ധതിയുടെ പിടവൂര്‍ വഴി കടന്നു പോകുന്ന ഇഞ്ചൂര്‍ ബ്രാഞ്ച് കനാലാണ് കൂട്ടമായിട്ടിറങ്ങിയ സംഘം ശുചീകരിച്ചത്. കെ.എം കെരീം, കെ.പി നിഷാദ്, കെ.ഇ യൂനുസ്, ഇ.എം ബഷീര്‍, ബി.എച്ച് മുഹമ്മത്, സുകുമാരന്‍ നായര്‍ തുടങ്ങിയവര്‍ ശുചീകരണ പ്രവര്‍ത്തനങ്ങള്‍ക്ക് നേതൃത്വം നല്‍കി.