തൊടുപുഴ: വീടിന്റെ മുറ്റത്തേക്കിറങ്ങിയ വിദ്യാര്‍ഥിനിക്കു തെരുവു നായയുടെ കടിയേറ്റു. തൊടുപുഴ എന്‍.ജി.ഒ യൂനിയന്‍ ഓഫിസിന് പുറകുവശത്തുള്ള റിട്ട. കെ.എസ്.ആര്‍.ടി.സി ഡ്രൈവര്‍ കൊച്ചുകോതവഴിക്കല്‍ സജീവിന്റെ മകള്‍ സ്വാതി (20)ക്കാണ് തെരുവുനായയുടെ കടിയേറ്റത്.
സ്വാതിയെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.ഇന്നലെ വൈകിട്ട് 4.30ഓടെ വീടിന്റെ പുറകുവശത്തെ വാതില്‍ തുറന്ന് മുറ്റത്തേക്കിറങ്ങിയ സ്വാതിയുടെ കാലില്‍ നായ കടിക്കുകയായിരുന്നു. ഗുരുതരമായി പരിക്കേറ്റ സ്വാതിയെ ആദ്യം തൊടുപുഴ ജില്ലാ ആശുപത്രിയിലും പിന്നീട് വിദഗ്ധ ചികിത്സക്കായി കോട്ടയം മെഡിക്കല്‍ കോളജിലേക്കും കൊണ്ടുപോയി. കടിച്ച നായയെ ഓടി കൂടിയ നാട്ടുകാര്‍ തല്ലിക്കൊന്നു.
തൊടുപുഴ നഗരത്തില്‍ തെരുവുനായയുടെ ശല്യം വര്‍ധിച്ചിട്ടും ശക്തമായ നടപടികള്‍ സ്വീകരിക്കുവാന്‍ നഗരസഭാ അധികൃതര്‍ തയ്യാറാകാത്തതില്‍ വ്യാപക പ്രതിഷേധം ഉയര്‍ന്നിട്ടുണ്ട്. കഴിഞ്ഞ രണ്ടാഴ്ചക്കുള്ളില്‍ തൊടുപുഴ നഗര പരിധിക്കുള്ളില്‍ നിരവധി പേരുടെ വളര്‍ത്തു മൃഗങ്ങളെ നായ കടിച്ചിരുന്നു. പകല്‍ നഗരത്തിലൂടെ കൂട്ടമായി അലഞ്ഞു തിരിയുന്ന തെരുവു നായ്ക്കള്‍ നിരവധി വാഹനാപകടങ്ങള്‍ക്കും കാരണമാകുന്നുണ്ട്. ഇരുചക്ര വാഹനങ്ങളാണ് കൂടുതലായും അപകടത്തില്‍പ്പെടുന്നത്.