നീലേശ്വരം: റെയില്‍വേ അധികൃതര്‍ വാഹനങ്ങള്‍ക്കു മുകളില്‍ മരക്കൊമ്പുകള്‍ മുറിച്ചിട്ടതായി പരാതി. നീലേശ്വരം റെയില്‍വേ സ്റ്റേഷന്‍ റോഡരികില്‍ പാര്‍ക്ക് ചെയ്ത വാഹനങ്ങള്‍ക്കു മുകളില്‍ സമീപത്തെ മരത്തിന്റെ കൊമ്പുകള്‍ മുറിച്ചിട്ടതായാണു പരാതി. ബൈക്ക്, കാര്‍ എന്നിവയ്ക്കു മുകളിലാണ് മരക്കൊമ്പുകള്‍ മുറിച്ചിട്ടത്. ചില വണ്ടികള്‍ക്കു കേടുപാടുകളും സംഭവിച്ചു. റെയില്‍വേ വൈദ്യുതവല്‍ക്കരണത്തിന്റെ ഭാഗമായി ഇലക്ട്രിക്കല്‍ വിഭാഗമാണ് കൊമ്പുകള്‍ വെട്ടിയത്. നീലേശ്വരം റെയില്‍വേ സ്റ്റേഷനരികില്‍ വാഹനങ്ങള്‍ വാടക നല്‍കി പാര്‍ക്ക് ചെയ്യാനുള്ള സൗകര്യമുണ്ടെങ്കിലും ചിലര്‍ റോഡരികിലാണ് വാഹനങ്ങള്‍ പാര്‍ക്ക് ചെയ്യാറ്. മരക്കൊമ്പുകള്‍ മുറിക്കുന്നതിനു മുമ്പ് മുന്നറിയിപ്പ് നല്‍കിയിരുന്നെങ്കില്‍ വാഹനങ്ങള്‍ മാറ്റി പാര്‍ക്കു ചെയ്യുമായിരുന്നുവെന്ന് ഉടമകള്‍ പറഞ്ഞു. എന്നാല്‍ റെയില്‍വേയുടെ സ്ഥലത്ത് റോഡരികില്‍ പാര്‍ക്ക് ചെയ്യുന്നത് നിയമ ലംഘനമാണെന്ന് റെയില്‍വേ അധികൃതരും പറഞ്ഞു.