മഞ്ചേരി: ഒന്നര കിലോ കഞ്ചാവുമായി ഒരാള്‍ മഞ്ചേരി പൊലിസിന്റെ പിടിയിലായി. കോഴിക്കോട് കൊയിലാണ്ടി ചേലിയ അടിയള്ളൂര്‍ വീട്ടില്‍ റഫീഖാ (42) ണ് പിടിയിലായത്. മഞ്ചേരി മുട്ടിപ്പാലത്തുവച്ച് കഞ്ചാവും ആവശ്യക്കാര്‍ക്കു തൂക്കിനല്‍കുന്ന ചെറിയ ത്രാസും ബൈക്കും സഹിതമാണ് ഇയാള്‍ പിടിയിലായത്.
മഞ്ചേരിയിലും പരിസര പ്രദേശങ്ങളിലും വിദ്യാലയങ്ങള്‍ കേന്ദ്രീകരിച്ചു വ്യാപകമായ രീതിയില്‍ കഞ്ചാവ് വിപണനം നടക്കുന്നുണ്ടെന്ന വിവരത്തിന്റെ അടിസ്ഥാനത്തില്‍ പൊലിസ് അന്വേഷണം ശക്തമാക്കിയിരുന്നു. ആന്ധ്ര, മധുര, കമ്പം, തേനി എന്നിവിടങ്ങളില്‍നിന്നു വലിയ അളവില്‍ കൊണ്ടുവന്നാണ് ഇവിടെ വില്‍പന നടത്തുന്നതെന്നു വിശദമായ ചോദ്യംചെയ്യലില്‍ ഇയാള്‍ പൊലിസിനു മൊഴിനല്‍കി.
നേരത്തേയും നിരവധിതവണ പ്രതി ഇത്തരത്തില്‍ കഞ്ചാവ് കെട്ടുകള്‍ കൊണ്ടുവന്നിട്ടുണ്ട്. ജില്ലയിലേക്ക് ഇത്തരത്തില്‍ കഞ്ചാവ് എത്തിക്കുന്നവരെക്കുറിച്ച് വിവരങ്ങള്‍ ലഭിച്ചിട്ടുണ്ടെന്നും അന്വേഷണം ശക്തമാക്കിയിട്ടുണ്ടന്നും പൊലിസ് പറഞ്ഞു. മഞ്ചേരി സി.ഐ കെ.എം ബിജുവിന്റെ നേതൃത്വത്തില്‍ എസ്.ഐ കെ. വിശ്വമോഹന്‍, പ്രത്യേക അന്വേഷണ സംഘങ്ങളായ ഉണ്ണികൃഷ്ണന്‍ മാരാത്ത്, ടി. ശ്രീകുമാര്‍, പി. സഞ്ജീവ്, സജയകുമാര്‍, ദിനേഷ് എന്നിവരാണ് പ്രതിയെ പിടികൂടിയത്.