തൃശൂര്‍: സംസ്ഥാന സ്‌കൂള്‍ കലോത്സവത്തിന് ഇന്ന് രാവിലെ 9.30ന് ഡി.പി.ഐ പതാക ഉയര്‍ത്തിയതിന് ശേഷം ജില്ലകള്‍ക്കായുള്ള രജിസ്‌ട്രേഷന്‍ ആരംഭിക്കും. തൃശൂര്‍ മോഡല്‍ ബോയ്‌സില്‍ രജിസ്‌ട്രേഷനായി 14 കൗണ്ടറുകള്‍ ഒരുക്കിയിട്ടുണ്ട്. മത്സരാര്‍ഥികളുടെ തിരിച്ചറയില്‍ കാര്‍ഡിന്റെ കോപ്പിയുമായി വന്ന് ജില്ലാ ടീം ലീഡര്‍മാരും ഡി.ഡി.ഇ ഓഫിസിലെ ഉദ്യോഗസ്ഥരും വിദ്യാര്‍ഥികളുടെ പാര്‍ട്ടിസിപ്പേഷന്‍ കാര്‍ഡ് കൈപ്പറ്റണം. രജിസ്‌ട്രേഷന്‍ കൗണ്ടറില്‍ നിന്ന് വേദികളെക്കുറിച്ചുള്ള വിവരങ്ങളും മറ്റും സൂചിപ്പിക്കുന്ന ബുക്ക് ലെറ്റുകള്‍ ലഭിക്കും. നഗര പ്രദേശത്തിന് ചുറ്റുമുള്ള 21 വിദ്യാലയങ്ങളിലായാണ് വദ്യാര്‍ഥികള്‍ക്ക് താമസ സൗകര്യം ഒരുക്കിയിരിക്കുന്നത്. വിവിധയിടങ്ങളില്‍ നിന്നായി തൃശൂരില്‍ എത്തുന്ന മത്സരാര്‍ഥികള്‍ക്കും അധ്യാപകര്‍ക്കും വിവരങ്ങള്‍ അറിയാന്‍ റെയില്‍വെ സ്റ്റേഷനിലും കെ.എസ്.ആര്‍.ടി.സി സ്റ്റാന്റിലും പ്രത്യേക കൗണ്ടറും ഒരുക്കിയിട്ടുണ്ട്. കൗണ്ടറിലെത്തുന്ന കുട്ടികള്‍ക്ക് പഴം പുഴുങ്ങിയത്, കപ്പ പുഴുക്ക്, കട്ടന്‍കാപ്പി എന്നീ ഭക്ഷണവും ലഭിക്കും.