കരുനാഗപ്പള്ളി: അഞ്ചുകിലോ കഞ്ചാവുമായി യുവാവും യുവതിയും പിടിയിലായി. കരുനാഗപ്പള്ളി എക്‌സൈസ് റേഞ്ച് ഇന്‍സ്‌പെക്ടര്‍ പി.എ സഹദുല്ലയുടെ നേതൃത്വത്തിലുള്ള സംഘമാണ് ഇവരെ പിടികൂടിയത്.
കടവൂര്‍ വെങ്കേക്കര ജങ്ഷന് സമീപം വാടകയ്ക്ക് താമസിക്കുന്ന ശക്തികുളങ്ങര കല്ലുംപുറത്ത് സരള സദനത്തില്‍ രാഖിലത (32), ശക്തികുളങ്ങര കല്ലുംപുറത്ത് വിശാഖ് ഭവനത്തില്‍ വിശാഖ് മോന്‍ (24) എന്നിവരാണ് അറസ്റ്റിലായത്. ഇവര്‍ ബന്ധുക്കളാണ്.
ദേശീയപാതയില്‍ ഇടപ്പള്ളിക്കോട്ടയ്ക്ക് സമീപത്തുനിന്ന് വാഹന പരിശോധനയ്ക്കിടെയാണ് വിശാഖ് മോനെ എക്‌സൈസ് സംഘം പിടികൂടുന്നത്. ഇയാളുടെ ബൈക്കില്‍നിന്ന് രണ്ടുകിലോ കഞ്ചാവും പിടിച്ചെടുത്തു. ഇയാളെ ചോദ്യം ചെയ്തതില്‍ നിന്നാണ് രാഖിലതയെക്കുറിച്ചുള്ള വിവരം ലഭിക്കുന്നത്. തുടര്‍ന്ന് രാഖിലതയെയും എക്‌സൈസ് സംഘം കസ്റ്റഡിയിലെടുക്കുകയായിരുന്നു. ഇവരില്‍നിന്ന് മൂന്നുകിലോ കഞ്ചാവും പിടിച്ചെടുത്തു.
തെങ്കാശിയില്‍ നിന്നാണ് ഇവര്‍ കഞ്ചാവ് കൊണ്ടുവന്നതെന്ന് എക്‌സൈസ് അറിയിച്ചു. കഞ്ചാവ് കടത്തിയ കേസില്‍ രാഖിലതയുടെ ഭര്‍ത്താവ് സ്റ്റീഫന്‍ നേരത്തെ കരുനാഗപ്പള്ളി എക്‌സൈസ് സംഘത്തിന്റെ പിടിയിലായിരുന്നു. സ്റ്റീഫന്‍ ജയിലിലായതോടെ രാഖിലത കഞ്ചാവ് വില്‍പ്പന തുടരുകയായിരുന്നുവെന്നും എക്‌സൈസ് അറിയിച്ചു.