കാബുള്‍: അമേരിക്കന്‍ സൈന്യം അഫ്ഗാന്‍ വിടാന്‍ സമയമായെന്ന് പ്രസിഡന്റ് ഡൊണാള്‍ഡ് ട്രംപിനോട് താലിബാന്‍. ട്രംപിനുള്ള തുറന്ന കത്ത് താലിബാന്റെ വെബ്‌സെറ്റിലാണ് പ്രസിദ്ധീകരിച്ചിരിക്കുന്നത്.
15 വര്‍ഷത്തെ അധിനിവേശം കൊണ്ട് രക്തചൊരിച്ചിലും നാശവുമല്ലാതെ മറ്റൊന്നുമുണ്ടായിട്ടില്ലെന്ന് കത്തില്‍ ചൂണ്ടിക്കാട്ടുന്നു. ട്രില്യണ്‍ ഡോളറുകള്‍ മുടക്കി അമേരിക്ക നടത്തിയ അധിനിവേശം അവരുടെ വിശ്വാസ്യത തകര്‍ത്തു. ഇനിയെങ്കിലും ഈ യുദ്ധത്തിന് അറുതി വരുത്തണമെന്നും താലിബാന്‍ കത്തില്‍ ആവശ്യപ്പെട്ടു.
2001ലാണ് അമേരിക്കയുടെ അഫ്ഗാന്‍ അധിനിവേശം തുടങ്ങിയത്. കോടിക്കണക്കിന് ഡോളറാണ അധിനിവേശത്തിനായി അമേരിക്ക ചെലവഴിച്ചത്. വിയറ്റ്‌നാമിലെ അധിനിവേശത്തിന് ശേഷം അമേരിക്ക നടത്തിയ ഏറ്റവും വലിയ യുദ്ധമായിരുന്നു അഫ്ഗാനിസ്ഥാനിലേത്.
എന്നാല്‍ ഇതുവരെയായിട്ടും അഫ്ഗാന്‍ വിഷയത്തില്‍ കൃത്യമായ നിലപാട് വ്യക്തമാക്കാന്‍ ട്രംപ് തയ്യാറായിട്ടില്ല. നാറ്റോ സൈന്യത്തിന്റെ ഭാഗമായി എകദേശം 8,400 അമേരിക്കന്‍ സൈന്യം അഫ്ഗാനിലുണ്ടെന്നാണ് കണക്കുകള്‍.