കോട്ടയം: രാഷ്ട്ര രക്ഷയ്ക്ക് സൗഹൃദത്തിന്റെ കരുതല്‍ എന്ന പ്രമേയം ഉയര്‍ത്തി എസ്.കെ.എസ്.എസ്.എഫ് സംഘടിപ്പിക്കുന്ന മനുഷ്യ ജാലിക ഇന്ന് ഈരാറ്റുപേട്ടയില്‍ നടക്കും.
വൈകുന്നേരം 4.30 ന് ഈരാറ്റുപേട്ട മുഹ്‌യുദ്ദീന്‍ പള്ളിക്ക് സമീപം കോട്ടുമല ബാപ്പു മുസ്‌ലിയാര്‍ നഗറിലാണ് ജാലിക നടക്കുക.
എസ്.എം.എഫ് കോട്ടയം ജില്ലാ പ്രസിഡന്റ് ഹാജി എസ്.എം ഫുആദ് ഹാജിയുടെ അധ്യക്ഷതയില്‍ ചേരുന്ന സമ്മേളനം പാണക്കാട് സയ്യിദ് ശമീര്‍അലി ശിഹാബ് തങ്ങള്‍ ഉദ്ഘാടനം ചെയ്യും.
മഅ്മൂന്‍ ഹുദവി വണ്ടൂര്‍ മുഖ്യപ്രഭാഷണം നടത്തും. എം.ജി യൂനിവേഴ്‌സിറ്റി സി.എച്ച് ചെയര്‍പേഴ്‌സണ്‍ ഡോ. സുബൈര്‍ ഹുദവി ചേകന്നൂര്‍ പ്രമേയ പ്രഭാഷണം നടത്തും.
ശബരിമല മേല്‍ശാന്തി എസ്.ഇ ശങ്കരന്‍ നമ്പൂതിരി, പാലാ രൂപതാ കോര്‍പ്പറേറ്റ് സെക്രട്ടറി ഫാദര്‍ മാത്യുചന്ദ്രന്‍ കുന്നേല്‍ എന്നിവര്‍ വിശിഷ്ടാതിഥികളാകും. ഇന്ത്യയ്ക്കകത്തും പുറത്തുമായി നാല്‍പ്പത് കേന്ദ്രങ്ങളില്‍ മനുഷ്യ ജാലിക സംഘടിപ്പിക്കുന്നതിന്റെ ഭാഗമായാണ് കോട്ടയം ജില്ലയില്‍ ഈരാറ്റുപേട്ടയില്‍ മനുഷ്യ ജാലിക നടത്തുന്നത്.