മാനന്തവാടി: ചുണ്ടുകള്‍ കൊണ്ടു വരച്ച മുവായിരത്തോളം ചിത്രങ്ങള്‍ കേരളത്തിനകത്തും പുറത്തും പ്രദര്‍ശിപ്പിച്ച് ശ്രദ്ധ നേടിയ സുനിതയുടെ ചിത്ര പ്രദര്‍ശനം ലളിതകലാ അക്കാദമി ആര്‍ട്ട് ഗാലറിയില്‍ ആരംഭിച്ചു. ജേസിസിന്റെ സഹകരണത്തോടെയാണ് പ്രദര്‍ശനം. ചിത്രകാരന്‍ ജോസഫ് എം. വര്‍ഗീസ് ഉദ്ഘാടനം ചെയ്തു. ജേസിസ് പ്രസിഡന്റ് ജിന്‍സ് ഫാന്റസി അധ്യക്ഷനായി. ജേസിസ് മുന്‍ പ്രസിഡന്റ് എം.ജി സേവ്യര്‍, ശ്രീജേഷ് ആലഞ്ചേരി, മാനന്തവാടി ട്രാഫിക് സബ് ഇന്‍സ്‌പെക്ടര്‍ രഘുനന്ദന്‍, എം.ഒ റെജി, സണ്ണി മാനന്തവാടി, സാദിര്‍ തലപ്പുഴ, ടി.കെ ഹാരീസ്, അനില്‍ കുറ്റിച്ചിറ, ഫ്രാന്‍സിസ് ബേബി സംസാരിച്ചു.
കൈ കൊണ്ട് ചിത്രം വരച്ചിരുന്ന സുനിതക്ക് അസുഖം ബാധിച്ചപ്പോള്‍ ചുണ്ടുകള്‍ കൊണ്ട് വരയ്ക്കാന്‍ പ്രേരിപ്പിച്ചത് സഹോദരനും ചിത്രകാരനുമായ ഗണേഷ് കുമാറാണ്. സിംഗപ്പൂര്‍, പോണ്ടിച്ചേരി, ബാഗ്ലൂര്‍, കൊച്ചി, മംഗലാപുരം, കണ്ണൂര്‍, കാഞ്ഞങ്ങാട് എന്നിവിടങ്ങളില്‍ഇതിനോടകം നിരവധി എക്‌സിബിഷനുകള്‍ നടത്തിയ സുനിതക്ക് ശ്രേഷ്ഠ വനിതാ പുരസ്‌ക്കാരം, കേന്ദ്ര ഗവണ്‍മെന്റിന്റെ മൊമന്റോ തുടങ്ങിയ അംഗീകാരങ്ങള്‍ ലഭിച്ചിട്ടുണ്ട്. ചിത്ര പ്രദര്‍ശനം 29ന് സമാപിക്കും.