നെടുമ്പാശ്ശേരി: സുരക്ഷാ ഉദ്യോഗസ്ഥരോട് തന്റെ കൈവശം ബോംബുണ്ടെന്ന് പറഞ്ഞ യാത്രക്കാരന്‍ നെടുമ്പാശ്ശേരി അന്താരാഷ്ട വിമാനത്താവളത്തില്‍ പിടിയിലായി.
വ്യാഴാഴ്ച്ച വൈകീട്ട് 3.30നുള്ള എയര്‍ ഏഷ്യ വിമാനത്തില്‍ ബാംഗ്ലൂരിലേക്ക് പോകാനെത്തിയ കടവന്ത്ര സ്വദേശി മനോജ് (45) ആണ് പിടിയിലായത്. റിപ്പബ്ലിക്ക് ദിനത്തോടനുബന്ധിച്ച് വിമാനത്താവളത്തില്‍ പരിശോധനകള്‍ കര്‍ശനമാക്കിയിരുന്നു. അഭ്യന്തര റെര്‍മിനലിലെത്തിയ മനോജിനെ മൂന്നാം പ്രാവശ്യം പരിശോധനയ്ക്ക് വിധേയമാക്കിയപ്പോഴാണ് ഇയാള്‍ സി.ഐ.എസ്.എഫ് ഉദ്യോഗസ്ഥരോട് കയര്‍ത്തത്. ഇതിനൊപ്പം തന്റെ കൈവശം കുറെ ബോംബുകളുണ്ടെന്നും ഇയാള്‍ പറയുകയായിരുന്നു.
ഉടന്‍ തന്നെ സുരക്ഷാ ഉദ്യോഗസ്ഥര്‍ ഇയാളെ കസ്റ്റഡിയിലെടുക്കുകയായിരുന്നു. ഇയാളെ നെടുമ്പാശ്ശേരി പൊലിസിനു കൈമാറി.