അരീക്കോട്: അഞ്ചുവര്‍ഷം മുമ്പ് അധ്യാപകരും പൂര്‍വ വിദ്യാര്‍ഥികളും മണ്ണിലിറങ്ങിയപ്പോള്‍ സ്‌കൂളിലെത്തുന്ന പിഞ്ചു വിദ്യാര്‍ഥികള്‍ക്ക് നിത്യേനെ വാഴപ്പഴം നല്‍കാനാകുമെന്ന് കരുതിയിരുന്നില്ല.
ഊര്‍ങ്ങാട്ടീരി പഞ്ചായത്തിലെ കുത്ത്പറമ്പ് ഗവ. എല്‍ പി സ്‌കൂളിലെ വിദ്യാര്‍ഥികള്‍ക്കാണ് അധ്യാപകര്‍ എല്ലാ ദിവസവും പഴവര്‍ഗങ്ങള്‍ എത്തിച്ച് നല്‍കുന്നത്.
അഞ്ചു വര്‍ഷം മുമ്പാണ് സ്‌കൂള്‍ ഗ്രൗണ്ടിന്റെ ഒരു ഭാഗത്ത് അധ്യാപകരും രക്ഷിതാക്കളും സഹകരിച്ച് വാഴത്തോട്ടം ഒരുക്കിയത്. പൂവന്‍ പഴം, റോബസ്റ്റ്, ഏത്തപ്പഴം തുടങ്ങിയ വിവിധയിനം പഴവര്‍ഗങ്ങള്‍ ഉള്‍പ്പെടുന്ന കൃഷിയിടം ഇന്നും അധ്യാപകരുടെ നേതൃത്വത്തില്‍ തുടര്‍ന്ന് പോരുന്നുണ്ട്. കുത്ത്പറമ്പ് സ്‌കൂളിന് പുറമെ തൊട്ടടുത്തുള്ള നഴ്‌സറിയിലും ഉപജില്ലാ ഓഫിസിലും പൂവന്‍ പഴം വിതരണം ചെയ്യാന്‍ സാധിച്ചിട്ടുണ്ടെന്ന് പ്രധാനാധ്യാപകി ജെസ്സി പറഞ്ഞു.
അധ്യാപകരായ എം.ടി ഇബ്രാഹിം, നാസര്‍, വി.പി ജാഫര്‍, ജിഷ, ഷമീമ എന്നിവരാണ് വാഴകൃഷിയെ പരിചരിക്കുന്നത്.