കൊടുമ്പ്: ജില്ലയില്‍ കാര്‍ഷിക ഇന്‍ഷുറന്‍സിന്റെ പേരില്‍ തട്ടിപ്പ് നടത്തുന്നതായി പരാതി. കൊടുമ്പ് പഞ്ചായത്തിലെ പാടശേഖരസമിതികളില്‍ നിന്നാണ് ഇന്‍ഷുറന്‍സിന്റെ പേരില്‍ തട്ടിപ്പ് നടത്തിയതായി പരാതി ഉയര്‍ന്നത്. യുണൈറ്റഡ് ഇന്ത്യ ഇന്‍ഷുറന്‍സ് കമ്പനിയില്‍ പോളിസിയില്‍ അംഗമാകാനുള്ള തീയതി കഴിഞ്ഞ ആഴ്ച അവസാനിച്ചു. ഹെക്ടറിന് 750 രൂപയാണ് പ്രീമിയം തുക. ഇതാകട്ടെ ബാങ്ക് വായ്പ എടുത്തവര്‍ക്കാണ് പ്രധാനമായും ഈ ആനുകൂല്യം. വായ്പ എടുക്കാത്തവര്‍ക്ക് നേരിട്ടും ചേരാന്‍ കഴിയും. അവസാന തീയതി കഴിഞ്ഞ ആഴ്ചയായിരുന്നു. വിളകള്‍ ഉണക്കം ബാധിക്കുക, വെള്ളമില്ലാതെ നശിക്കുക എന്നിവക്കെല്ലാമാണ് ഇന്‍ഷുറന്‍സ് നടപ്പാക്കുന്നത്. ഒരു പ്രദേശത്തുള്ള മുഴുവന്‍ പാടശേഖരവും നശിച്ചാല്‍ മാത്രമേ പോളിസിയുടെ ആനുകൂല്യം കര്‍ഷകന് ലഭിക്കുകയുള്ളു. മാത്രമല്ല കാലാവസ്ഥയുടെ വ്യക്തമായ കണക്കും പരിശോധിച്ചാണ് ആനുകൂല്യം നല്‍കാറുള്ളത്. കേന്ദ്ര സര്‍ക്കാര്‍ നടത്തുന്ന നിരവധി ഇന്‍ഷുറന്‍സ് പോളിസി തട്ടിപ്പുകളില്‍ ഒന്നാണിത്. വിളകള്‍ നശിച്ച കര്‍ഷകര്‍ക്ക് ഇന്‍ഷുറന്‍സ് ആനുകൂല്യം ലഭിക്കുന്നത് അപൂര്‍വ്വമാണ്. മിക്കതിനും എന്തെങ്കിലും കാരണം പറഞ്ഞ് തള്ളുകയാണ് ചെയ്യുന്നത്. എന്നാല്‍ കൊടുമ്പ് പഞ്ചായത്തിലെ പാടശേഖരസമിതികളില്‍ നിന്ന് പോളിസി പ്രീമിയം ഈടാക്കിയത് അവസാന തീയതി കഴിഞ്ഞശേഷം ബുധനാഴ്ചയാണ്. മാത്രമല്ല പ്രീമിയം തുക നല്‍കിയതിന് രസീതി നല്‍കിയിട്ടില്ല. പകരം ഒരു തുണ്ടു കടലാസില്‍ പലചരക്ക് കടയിലെ കണക്ക് എഴുതുന്ന രീതിയില്‍ എഴുതി നല്‍കിയിരിക്കുകയാണ്. പത്തോളം പാടശേഖരസമിതികളില്‍ നിന്ന് തുക കൈപ്പറ്റിയതായാണ് ആരോപണം. കഴിഞ്ഞ വര്‍ഷവും ഇതേരീതിയില്‍ ഇന്‍ഷുറന്‍സ് പോളിസിയുടെ പേരില്‍ തട്ടിപ്പ് നടത്തിയതായി പാടശേഖരസമിതികള്‍ പറയുന്നു.
എന്നാല്‍ അവസാന തീയതിയായതുകൊണ്ട് കൂട്ടത്തോടെ പോളിസി വാങ്ങിയതായാണ് മനസിലാക്കുന്നതെന്ന് കൊടുമ്പ് കൃഷി ഓഫീസര്‍ അറിയിച്ചു. കാലാവസ്ഥ വ്യതിയാനം മൂലം ഉണ്ടാകുന്ന നാശനഷ്ടങ്ങള്‍ക്ക് നല്‍കുന്നതാണിത്. തൊട്ടടുത്ത കാലാവസ്ഥ കേന്ദ്രത്തിന്റെ ഒരു വര്‍ഷത്തെ ഡാറ്റ പരിശോധിച്ചശേഷം മാത്രമെ ഇതില്‍ ആനുകൂല്യം ലഭിക്കൂ. ഒരു പക്ഷേ ലഭിക്കാതിരിക്കുകയും ചെയ്യാം. കൃഷിഭവനില്‍ ഇതിന്റെ വിശദാംശങ്ങള്‍ അറിയണമെന്നില്ലെന്നുമാണ് അധികൃതരുടെ നിലപാട്.