എരുമപ്പെട്ടി: വടക്കാഞ്ചേരി കുന്നംകുളം പ്രധാന പാതയിലെ നെല്ലുവായ് പാലത്തിന്റെ വീതി വര്‍ദ്ധിപ്പിക്കല്‍ നിര്‍മ്മാണം പാതി വഴിയില്‍ തടസപ്പെട്ടു. പുറമ്പോക്ക് ഭൂമി അളന്നെടുക്കണമെന്ന് ആവശ്യപ്പെട്ട് നാട്ടുകാര്‍ തടസപ്പെടുത്തിയ നിര്‍മാണ പ്രവര്‍ത്തനങ്ങള്‍ പുനരാരംഭിക്കാന്‍ വേണ്ട നടപടി കൈകൊള്ളാന്‍ അധികൃതര്‍ തയ്യാറാകുന്നില്ല.

ദിവസങ്ങള്‍ നീണ്ടുപോകുന്നതിനാല്‍ കരാറുകാരന്‍ നിര്‍മാണ പ്രവര്‍ത്തനത്തില്‍ നിന്നും ഒഴിവാകാന്‍ ശ്രമം നടത്തുന്നതായി സൂചന.
ആലത്തൂര്‍ ഗുരുവായൂര്‍ സംസ്ഥാന പാതകൂടിയായ വടക്കാഞ്ചേരി കുന്നംകുളം റോഡിലെ എരുമപ്പെട്ടി നെല്ലുവായ് പാലത്തിന്റെ വീതി വര്‍ധിപ്പിക്കുന്നതുമായി ബന്ധപ്പെട്ടുള്ള നിര്‍മ്മാണ പ്രവര്‍ത്തനങ്ങള്‍ ഒന്നര വര്‍ഷം മുമ്പാണ് ആരംഭിച്ചത്.
സമാന്തര റോഡ് നിര്‍മാണം, കോണ്‍ഗ്രീറ്റ് കാന നിര്‍മാണം ഇതോടൊപ്പം ഉള്‍പ്പെടുത്തിയിട്ടുണ്ട്. സംസ്ഥാന പൊതുമരാമത്ത് വകുപ്പാണ് ലക്ഷങ്ങള്‍ മുടക്കി പദ്ധതി നടപ്പിലാക്കുന്നത്. എന്നാല്‍ പണികള്‍ ആരംഭിച്ചത് മുതല്‍ തന്നെ നാട്ടുകാരും പ്രദേശത്തെ ഡ്രൈവേഴ്‌സ് തൊഴിലാളികളും ആരോപണങ്ങളും പ്രതിഷേധവുമായി രംഗത്തെത്തിയത് നിര്‍മ്മാണ പ്രവര്‍ത്തനങ്ങള്‍ അനന്തമായി നീണ് പോകാന്‍ ഇടയാക്കി.
സമാന്തര റോഡ് നിര്‍മാണം നടത്തുമ്പോള്‍ സ്വകാര്യ വ്യക്തികളുടെ കൈവശമുള്ള പുറമ്പോക്ക് ഭൂമികള്‍ അളന്ന് തിരിച്ച് പിടിക്കണമെന്നും പാലത്തിന് മുകളിലും വശങ്ങളിലുമായി സ്ഥാപിച്ചിട്ടുള്ള ജലവിതരണ പൈപ്പുകളുടെ ചോര്‍ച്ചയും തകരാറുകളും പരിഹരിക്കണമെന്നും നിലവാരമുള്ള പൈപ്പുകള്‍ സ്ഥാപിക്കണമെന്നും ആവശ്യപ്പെട്ടാണ് പൊതുജനങ്ങള്‍ നിര്‍മാണ പ്രവര്‍ത്തനങ്ങള്‍ തടഞ്ഞത്.
എതിര്‍പ്പുകള്‍ രൂക്ഷമായതിനെ തുടര്‍ന്ന് കരാറുകാരന് പണികള്‍ നിര്‍ത്തിവെക്കേണ്ടി വന്നു. എന്നാല്‍ പരാതികള്‍ പരിഹരിക്കുന്നതില്‍ ബന്ധപ്പെട പൊതു മരാമത്ത് വകുപ്പും ജല വിതരണ പകുപ്പും കാര്യമായ നടപടികളൊന്നും സ്വീകരിക്കുന്നില്ല.
അളവ് നടത്താന്‍ താലൂക്ക് സര്‍വ്വെ വിഭാഗത്തിന് അപേക്ഷ നല്‍കിയിട്ടുണ്ടെങ്കിലും തങ്ങള്‍ക്കതിന് സമയമില്ലെന്ന നിലപാടാണ് ഉദ്യോഗസ്ഥര്‍ സ്വീകരിക്കുന്നതെന്ന് ആക്ഷേപമുണ്ട്. പാലത്തിന്റെ വീതി വര്‍ധിപ്പിച്ച ഭാഗത്തേക്ക് റോഡ് നിര്‍മിക്കാന്‍ കഴിയാത്തത് വാഹനങ്ങള്‍ക്ക് വലിയ അപകട സാധ്യതയുണ്ടാക്കുന്നുണ്ട്.
ഇതിന് പുറമെ നിര്‍മാണ പ്രവര്‍ത്തനങ്ങളുടെ കാലാവധി കഴിയുന്നതിനാല്‍ ഇതിന് അനുവദിച്ച ഫണ്ട് പാഴായി പോകാന്‍ ഇടയുള്ളതായും സൂചനയുണ്ട്.
ഇതിനിടയില്‍ നിര്‍മാണ തടസപ്പെടുന്നതും നിര്‍മാണ സമഗ്രികളുടെ നിരക്ക് വര്‍ധിച്ചതും സാമ്പത്തിക നഷ്ടം വരുത്തിവയ്ക്കുന്നതിനാല്‍ കരാറുകാരന്‍ നിര്‍മാണ പ്രവര്‍ത്തനത്തില്‍ നിന്നും ഒഴിഞ്ഞു പോകുന്നതായി കാണിച്ച് പൊതു മരാമത്ത് വകുപ്പിന് കത്ത് നല്‍കിയതായും അറിയുന്നു.