മീനങ്ങാടി: മായം കലര്‍ന്ന വെളിച്ചെണ്ണ കടകളില്‍ വില്‍പ്പനക്കെത്തുമ്പോഴും നടപടിയെടുക്കാതെ അധികൃതര്‍. മീനങ്ങാടി ചീരാംകുന്ന് കടയില്‍ നിന്നും കൂളന്‍ചാല്‍ ശോഭന വാങ്ങിയ വെളിച്ചെണ്ണയിലാണ് മെഴുകു പോലെ തോന്നിപ്പിക്കുന്ന മായം കണ്ടെത്തിയത്. ചൂടാക്കിയിട്ടും വെളിച്ചെണ്ണയില്‍ മെഴുകുപോലെ കണ്ടതിനാല്‍ വെളിച്ചെണ്ണ വാങ്ങിയ കടയില്‍ കാണിക്കുകയായിരുന്നു. തുടര്‍ന്ന് കടയിലുള്ള മറ്റ് പാക്കറ്റുകളും കടയിലെ ജീവനക്കാര്‍ പരിശോധന നടത്തി. എല്ലാ പാക്കറ്റിലും ഇതുപോലെ മായം കണ്ടെത്തി. മലപ്പുറം ആസ്ഥാനമായി പ്രവര്‍ത്തിക്കുന്ന കമ്പനിയുടെ കോക്കോവിറ്റ എന്ന വെളിച്ചെണ്ണയിലാണ് ഇത്തരത്തില്‍ മായം കലര്‍ന്നതായി കണ്ടെത്തിയത്. ഇതുമായി ബന്ധപ്പെട്ട് വെളിച്ചെണ്ണ കവറിലുള്ള കസ്റ്റമര്‍ കെയര്‍ നമ്പറില്‍ വിളിച്ചപ്പോള്‍ അങ്ങനെ വരില്ലെന്നും പരിശോധിച്ചതിനു ശേഷം പറയാം എന്ന മറുപടിയുമാണ് ലഭിച്ചതെന്നും ശോഭനയുടെ മകന്‍ സുദീഷ് പറഞ്ഞു. കമ്പനിക്കെതിരേ നിയമപരമായി മുന്നോട്ട് പോവുമെന്നും ആരോഗ്യ പ്രശ്‌നമുണ്ടാക്കുന്ന ഇത്തരം മായം കലര്‍ത്തുന്നവരെ നിയമത്തിനുമുന്നില്‍ കൊണ്ടുവരുമെന്നും സുദീഷ് പറഞ്ഞു. ജില്ലയില്‍ ഇതിനുമുന്‍പും ഇത്തരത്തില്‍ മാലിന്യം കലര്‍ന്ന എണ്ണ വിപണിയില്‍ വില്‍പനക്കെത്തിയിരുന്നു. പഴകിയ എള്ളെണ്ണ, പാരഫിന്‍ വാക്‌സ്, നിറം മാറ്റിയ കരി ഓയില്‍, പാം ഓയില്‍, പാം കെര്‍ണല്‍ ഓയില്‍ തുടങ്ങിയ നിരവധി ആരോഗ്യ പ്രശ്‌നമുണ്ടാക്കുന്നവയാണ് വ്യാപകമായി വെളിച്ചെണ്ണയില്‍ ചേര്‍ത്ത് വില്‍ക്കുന്നത്. ബ്രാന്‍ഡഡ് വെളിച്ചെണ്ണയേക്കാള്‍ കുറഞ്ഞ വില കൊടുത്ത് വാങ്ങിക്കുന്ന ഇത്തരം കമ്പനികളുടെ വെളിച്ചെണ്ണ മികച്ച ലാഭമാണ് വ്യാപാരികള്‍ക്ക് നല്‍കുന്നത്. അതുകൊണ്ട് തന്നെ ഗുണനിലവാരം ആരും കാര്യമാക്കാറില്ലെന്നുമാണ് ബന്ധപ്പെട്ടവര്‍ പറയുന്നത്.