പാലക്കാട്: പദ്ധതിയും പണവുമുണ്ടായിട്ടും ഉദ്യോഗസ്ഥരുടെ കെടുകാര്യസ്ഥതയില്‍ കൊടുവായൂരിലെ വൃദ്ധസദനത്തിന്റെ കെട്ടിടനിര്‍മാണവും വൈകുന്നു. മൂന്നരവര്‍ഷം മുന്‍പ് മുഖ്യമന്ത്രിയെ കൊണ്ട് ശിലാസ്ഥാപനം നടത്തിയ പദ്ധതിയാണ് കരാറുകാര്‍ക്കു വേണ്ടി വൈകിപ്പിക്കുന്നത്. സാമൂഹീക നീതി വകുപ്പിന് കീഴില്‍ ജില്ലയിലെ ഏക വികലാംഗ വൃദ്ധസദനം കൊടുവായൂരിലാണ്.
ഇരുപത്തിഅഞ്ചു പേരുമായി ഇടുങ്ങിയ കെട്ടിടത്തിലെ സേവനം ഇപ്പോഴും തുടരുന്നു. കൂടുതല്‍ പേരെ താമസിപ്പിക്കാന്‍ നിലവിലുളള കെട്ടിടത്തില്‍ സ്ഥലമില്ല. ഈ സാഹചര്യത്തിലാണ് പുതിയ കെട്ടിടം നിര്‍മിക്കാന്‍ തീരുമാനമെടുത്തത്. 2013 ഏപ്രില്‍ 19ന് അന്ന് മുഖ്യമന്ത്രിയായിരുന്ന ഉമ്മന്‍ചാണ്ടിയാണ് ശിലാസ്ഥാപനം നടത്തിയത്. രണ്ടുകോടി അറുപത്തിഅഞ്ചു ലക്ഷത്തി അന്‍പതിനായിരം രൂപ സര്‍ക്കാര്‍ അനുവദിക്കുകയും ചെയ്തു. പക്ഷേ കെട്ടിടം നിര്‍മാണം ഇതുവരെ തുടങ്ങിയിട്ടില്ല.
കൊല്ലങ്കോട് ബ്ലോക്ക് പഞ്ചായത്താണ് നിര്‍മാണ ചുമതല ഏറ്റെടുത്തത്. ഒരുവര്‍ഷം കൊണ്ടു പൂര്‍ത്തിയാകേണ്ട പദ്ധതിക്ക് മൂന്നരവര്‍ഷമായിട്ടും കരാറുകാരെ കിട്ടിയില്ലെന്നാണ് കൊല്ലങ്കോട് ബ്ലോക്ക് പഞ്ചായത്തിന്റെ വിശദീകരണം. അസൗകര്യങ്ങളില്‍ വീര്‍പ്പുമുട്ടുന്ന കൊടുവായൂരിലെ വൃദ്ധസദനത്തിന് പുതിയ കെട്ടിടം എന്ന് യാഥാര്‍ഥ്യമാകുമെന്ന് ആര്‍ക്കുമറിയില്ല.