ചാലക്കുടി: കുടിവെള്ള ക്ഷാമം രൂക്ഷമാകുമ്പോഴും അധികൃതരുടെ അനാസ്ഥ കാരണം ചാട്ടുകല്ലത്തറ ലിഫ്റ്റ് ഇറിഗേഷന്‍ പദ്ധതി അവതാളത്തില്‍.
അതിരപ്പിള്ളി-പരിയാരം പഞ്ചായത്തുകളിലെ കുടിവെള്ള ക്ഷാമത്തിനു പരിഹാരമാകേണ്ട ചാട്ടുകല്ലുത്തറ പദ്ധതിയാണ് അവതാളത്തിലായിരിക്കുന്നത്.
പമ്പിങ് നിലച്ചിട്ട് 12 വര്‍ഷത്തോളമായി. അറ്റകുറ്റപ്പണികള്‍ നടത്താത്തതിനെ തുടര്‍ന്ന് പൈപ്പുകളെല്ലാം തുരുമ്പെടുത്തു തുടങ്ങിട്ടുണ്ട്. മോട്ടോര്‍ ഷെഡും വാട്ടര്‍ടാങ്കും മറ്റുപകരണങ്ങളും ജീര്‍ണാവസ്ഥയിലാണ്. ഇതോടെ വേനല്‍ കനക്കുന്നതോടെ പദ്ധതി പുനര്‍ജീവിപ്പിക്കണമെന്ന ആവശ്യം ശക്തമാവുകയാണ്.
കുടിവെള്ള ക്ഷാമപരിഹാരത്തിനായി അഞ്ചു ലക്ഷം രൂപ ചിലവഴിച്ചാണ് 2001ല്‍ പദ്ധതി ആരംഭിച്ചത്. നടത്തിപ്പിനായി ജനകീയ സമിതിയും രൂപീകരിച്ചിരുന്നു. ചാലക്കുടി പുഴയോരത്ത് മോട്ടോര്‍ സ്ഥാപിച്ച് ചാട്ടുകുളങ്ങര കുന്നിന്‍ മുകളിലെ വാട്ടര്‍ടാങ്കില്‍ വെള്ളം നിറച്ച് പൈപ്പുകള്‍ വഴി ജലവിതരണം നടത്തുന്നതായിരുന്നു പദ്ധതി.
ഇതിനായി 20 എച്ച്.പി മോട്ടോറും സ്ഥാപിച്ചിരുന്നു. തുടക്കത്തില്‍ കാര്യക്ഷമമായി പ്രവര്‍ത്തിച്ച പദ്ധതി മൂന്നു വര്‍ഷം പിന്നിട്ടതോടെ അവതാളത്തിലാവുകയായിരുന്നു. ജനകീയ സമിതിയിലെ രാഷ്ട്രീയമാണ് പദ്ധതിയുടെ പ്രവര്‍ത്തനം അവതാളത്തിലാകാന്‍ കാരണം. ഇതിനിടെ മോട്ടറിന്റെ പ്രവര്‍ത്തനവും നിലച്ചു. എന്നാല്‍ മോട്ടര്‍ ശരിയാക്കാന്‍ ആരും തയാറായില്ല. ഇതോടെ പദ്ധതിയുടെ പ്രവര്‍ത്തനം പൂര്‍ണമായും നിലയ്ക്കുകയായിരുന്നു. മോട്ടര്‍ നന്നാക്കാനോ പദ്ധതി പുനര്‍ജീവിപ്പിക്കാനോ ബന്ധപ്പെട്ടവര്‍ തയാറാകാഞ്ഞതിനെ തുടര്‍ന്ന് പ്രദേശവാസികള്‍ ദുരിതത്തിലായിരിക്കുകയാണ്. പദ്ധതി ഉടന്‍ പുനര്‍ജീവിപ്പിക്കണമെന്ന ആവശ്യം ശക്തമായിരിക്കുകയാണ്.