കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ കേരളത്തില്‍ നിന്ന് ഹജ്ജ് തീര്‍ഥാടനത്തിന് ഇത്തവണ ക്വാട്ടയേക്കാള്‍ ഇരട്ടിപേര്‍ക്ക് സീറ്റ് ലഭിക്കും. നറുക്കെടുപ്പ് കൂടാതെ നേരിട്ട് അവസരം ലഭിക്കുന്ന വിഭാഗത്തില്‍ അപേക്ഷകരുടെ എണ്ണം പതിനായിരം കവിഞ്ഞതോടെയാണിത്. 5030 സീറ്റുകളാണ് കേരളത്തിന്റെ നിലവിലെ ക്വാട്ട. ഇതിന് ഇരട്ടിയോളം പേരാണ് ഇത്തവണ നേരിട്ട് അവസരം ലഭിക്കുന്ന വിഭാഗത്തില്‍ ഇതുവരെ അപേക്ഷിച്ചത്.
നേരിട്ട് അവസരം ലഭിക്കുന്ന 10,062 പേരാണ് ഇന്നലെ വരെ ഹജ്ജ് കമ്മിറ്റിക്ക് അപേക്ഷ നല്‍കിയത്. 70 വയസിന് മുകളിലുള്ളവര്‍ 1516 പേരും, അഞ്ചാം വര്‍ഷക്കാരായി 8546 പേരുമാണ് അപേക്ഷ സമര്‍പ്പിച്ചവരിലുള്ളത്. ഇവര്‍ക്ക് നറുക്കെടുപ്പ് കൂടാതെ ഹജ്ജ് തീര്‍ഥാടനം നടത്താം.
മുന്‍ വര്‍ഷത്തേക്കാള്‍ 119 പേരാണ് ഈ വിഭാഗത്തില്‍ ഇത്തവണ അധികമുള്ളത്. കഴിഞ്ഞ വര്‍ഷം 70 വയസിന് മുകളിലുള്ളവര്‍ 1730 പേരും, അഞ്ചാം വര്‍ഷക്കാര്‍ 8213 പേരും ഉള്‍പ്പടെ 9943 പേരാണ് ഉണ്ടായിരുന്നത്. ഹജ്ജ് അപേക്ഷ സ്വീകരണം ഫെബ്രുവരി ആറുവരെയുള്ളതിനാല്‍ എണ്ണം ഇനിയും വര്‍ധിച്ചേക്കും. ഇന്നലെ വരെ കേരളത്തില്‍ അപേക്ഷിച്ചവരുടെ എണ്ണം 71,218 ആണ്.
ഇത്തവണയും 2011 ലെ മുസ്‌ലിം ജനസംഖ്യാനുപാതത്തിലായിരിക്കും കേന്ദ്ര ഹജ്ജ് കമ്മറ്റി ക്വാട്ട വീതംവയ്ക്കുക. ഇതുപ്രകാരം കേരളത്തിന്റെ ഹജ്ജ് ക്വാട്ട 5030 സീറ്റുകള്‍ മാത്രമാണ്. ഹജ്ജ് ക്വാട്ടയും അഡീഷനല്‍ സീറ്റും നല്‍കിയതിനു ശേഷമായിരിക്കും നറുക്കെടുപ്പ് വഴി അവസരം ലഭിച്ചവരുടെ വെയ്റ്റിങ് ലിസ്റ്റ് പരിഗണിക്കുക.
അപേക്ഷകര്‍ക്ക് എസ്.എം.എസ് ആയും,തപാല്‍ മുഖേനയും കവര്‍ നമ്പര്‍ അയക്കുന്നുണ്ട്. കവര്‍ നമ്പറുകള്‍ ഫെബ്രുവരി 18നകം ലഭിക്കാത്തവര്‍ ഹജ്ജ് അപേക്ഷയുടെയും ബന്ധപ്പെട്ട രേഖകളുടെയും കോപ്പി സഹിതം ഫെബ്രുവരി 20, 21,22 തിയതികളില്‍ ഹജ്ജ് കമ്മിറ്റി ഓഫിസുമായി ബന്ധപ്പെടണം. ഫെബ്രുവരി 22ന് ശേഷം ലഭിക്കുന്ന പരാതികള്‍ പരിഗണിക്കുന്നതല്ല.