തിരുവനന്തപുരം: ലോ അക്കാദമിയുടെ അധിക ഭൂമി ഏറ്റെടുക്കണമെന്ന് ആവശ്യപ്പെട്ട് ഭരണപരിഷ്‌കാര കമ്മിഷന്‍ ചെയര്‍മാന്‍ വി.എസ്. അച്യുതാനന്ദന്‍ റവന്യൂമന്ത്രിക്ക് കത്തു നല്‍കി.
അക്കാദമിക്ക് ആവശ്യമുള്ളതിലും അധികം ഭൂമി അനുവദിച്ചതിനെ കുറിച്ച് അന്വേഷണം വേണമെന്നും വി.എസ് കത്തില്‍ ആവശ്യപ്പെട്ടിട്ടുണ്ട്. വിദ്യാഭ്യാസ ആവശ്യത്തിനുള്ള ഭൂമി മറ്റ് ആവശ്യങ്ങള്‍ക്ക് ഉപയോഗിക്കുന്നത് അധാര്‍മികവും നിയമവിരുദ്ധവുമാണെന്നും വി.എസ് കുറ്റപ്പെടുത്തി.
ലോ അക്കാദമിയിലെ പ്രശ്‌നം വിദ്യാര്‍ഥി സമരം മാത്രമാണെന്നും ഭൂമി സംബന്ധമായ വിഷയം വിദ്യാര്‍ഥികള്‍ ഉന്നയിച്ചിട്ടില്ലെന്നും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ നേരത്തേ പറഞ്ഞിരുന്നു. ഇതിനെ തള്ളിക്കൊണ്ടാണ് വി.എസിന്റെ നടപടി. ലോ അക്കാദമിയിലെ വിദ്യാര്‍ഥികളുടെ പ്രശ്‌നം പൊതുപ്രശ്‌നമാണെന്നാണ് വി.എസിന്റെ നിലപാട്. ലോ അക്കാദമിയുടെ ഭൂമി സംബന്ധിച്ച് പരാതിയൊന്നും ലഭിച്ചിട്ടില്ലെന്ന് മന്ത്രി ഇ ചന്ദ്രശേഖരന്‍ നേരത്തേ പറഞ്ഞിരുന്നു.
പരാതി ലഭിച്ചാല്‍ അതേക്കുറിച്ച് അന്വേഷിക്കുമെന്നും മന്ത്രി മാധ്യമങ്ങളോടു പറഞ്ഞിരുന്നു. ഇതിനു പിന്നാലെയാണ് വി.എസ്. മന്ത്രിക്കു കത്ത് നല്‍കിയത്. അക്കാദമിയുടെ ഭൂമി വിനിയോഗത്തെ കുറിച്ച് അന്വേഷിക്കണമെന്നും വി.എസ് ആവശ്യപ്പെട്ടിട്ടുണ്ട്.
അക്കാദമിയുടെ 34.5 സെന്റ് സ്ഥലത്തില്‍ നിന്ന് 17.5 സെന്റ് സ്ഥലം ഹെതര്‍ കണ്‍സ്ട്രക്ഷന്‍സ് എന്ന റിയല്‍ എസ്‌റ്റേറ്റ് സ്ഥാപനത്തിന് കൈമാറിയതും ഇവിടെ ഫ്‌ളാറ്റ് നിര്‍മിച്ചതും ഗുരുതരമായ വീഴ്ചയാണെന്ന് വി.എസ് കുറ്റപ്പെടുത്തി.