ലക്‌നോ: കോണ്‍ഗ്രസ്-എസ്പി സഖ്യത്തിനായി പ്രചാരണത്തിനിറങ്ങില്ലെന്ന മുലായത്തിന്റെ വാക്കുകളെ അഖിലേഷ് യാദവ് തള്ളി. മുലായം തങ്ങള്‍ക്ക് വേണ്ടി പ്രചാരണത്തിനിറങ്ങുമെന്നും അഖിലേഷ് പറയുന്നു. കോണ്‍ഗ്രസ് സഖ്യത്തില്‍ താല്‍പര്യമില്ലാത്ത മുലായം തെരഞ്ഞെടുപ്പ് പ്രചാരണത്തിന് ഇറങ്ങില്ലെന്നാണ് പറയുന്നതെങ്കിലും ഇത് ശരിയല്ലെന്ന് അഖിലേഷ് യാദവ് പറയുന്നു. തെരഞ്ഞെടുപ്പ് ഫലം അടിയുറച്ചതാക്കാന്‍ കോണ്‍ഗ്രസ് സഖ്യം സഹായിക്കുമെന്ന് അഖിലേഷ് യാദവ് ആവര്‍ത്തിച്ചു.

ഒറ്റക്ക് മല്‍സരിച്ചാലും സമാജ്‌വാദി പാര്‍ട്ടി വിജയിക്കും. എന്നാല്‍ തെരഞ്ഞെടുപ്പ് ഫലം ഏറ്റവും ഉറപ്പുള്ളതാക്കാന്‍ കോണ്‍ഗ്രസ് സഖ്യം സഹായിക്കുമെന്നും അദ്ദേഹം വ്യക്തമാക്കി. വിജയ സാധ്യത നിലനില്‍ക്കെ മല്‍സരിക്കാമായിരുന്നു 105 സീറ്റുകള്‍ കോണ്‍ഗ്രസിന് നല്‍കിയതാണ് മുലായത്തെ ചൊടിപ്പിച്ചത്. സമാജ്‌വാദി പാര്‍ട്ടിക്കുള്ളില്‍ നിലനില്‍ക്കുന്ന ഭിന്നതകള്‍ പരിഹരിക്കപ്പെട്ടുവരുന്നതിനിടയിലാണ് കോണ്‍ഗ്രസ് ബന്ധത്തില്‍ ഇപ്പോഴും എതിര്‍പ്പുണ്ടെന്ന് മുലായം വ്യക്തമാക്കുന്നത്.

300 സീറ്റുകളിലധികം കോണ്‍ഗ്രസ്-എസ്പി സഖ്യം ഉത്തര്‍പ്രദേശില്‍ പിടിക്കുമെന്ന് ആദ്യ സംയുക്ത വാര്‍ത്താ സമ്മേളനത്തില്‍ രാഹുല്‍ ഗാന്ധിയും അഖിലേഷ് യാദവും പറഞ്ഞിരുന്നു. 403 മണ്ഡലങ്ങളില്‍ ഏഴ് ഘട്ടമായാണ് ഉത്തര്‍പ്രദേശ് തെരഞ്ഞെടുപ്പ്. ഫെബ്രുവരി 11ന് ആണ് ആദ്യ പോളിങ്.