നെടുമ്പാശ്ശേരി: ഉദ്ദേശിച്ച ജോലി ലഭിക്കാത്ത നിരാശയില്‍ വിദേശത്ത് നിന്നും മടങ്ങിയെത്തിയ യുവാവ് വിമാനത്തില്‍ നിന്നും ഇറങ്ങാതെ ബഹളം വച്ചു.
എയര്‍ ഇന്ത്യയുടെ എ 964 നമ്പര്‍ വിമാനത്തില്‍ ജിദ്ദയില്‍ നിന്നും ഇന്നലെ രാവിലെ 8.45ന് നെടുമ്പാശ്ശേരിയില്‍ എത്തിയ പത്തനംതിട്ട പന്തളം മാങ്ങാനം സ്വദേശി പ്ലാന്തോട്ടത്തില്‍ അബ്ദുള്‍ സലാമിന്റെ മകന്‍ ഷാനു(35) വാണ് വിമാനത്തില്‍ നിന്ന് ഇറങ്ങാതെ ബഹളം വച്ചത്. തുടര്‍ന്ന് സി.ഐ.എസ്.എഫ് ഉദ്യോഗസ്ഥരെത്തി ഇയാളെ ബലമായി പുറത്തിറക്കുകയായിരുന്നു.
വിമാനത്തില്‍ നിന്നും യാത്രക്കാര്‍ എല്ലാവരും ഇറങ്ങിയതിനു ശേഷവും ഷാനു സീറ്റില്‍ തന്നെ ഇരിക്കുകയായിരുന്നു. തുടര്‍ന്ന് വിമാനം നെടുമ്പാശ്ശേരിയില്‍ എത്തിയെന്നും വിമാനത്തില്‍ നിന്നും ഇറങ്ങണമെന്നും വിമാന ജീവനക്കാര്‍ ആവര്‍ത്തിച്ച് ആവശ്യപ്പെട്ടിട്ടും ഇത് കൂട്ടാക്കാതെ ബഹളം വക്കുന്നത് തുടര്‍ന്നു. പിന്നീട് ഗത്യന്തരമില്ലാതെ വന്നപ്പോഴാണ് സി.ഐ.എസ്.എഫിന്റെ സഹായം തേടിയത്.
സി.ഐ.എസ്.എഫ് ഉദ്യോഗസ്ഥര്‍ ആവശ്യപ്പെട്ടിട്ടും വിമാനത്തില്‍ നിന്നും ഇറങ്ങാതെ ബഹളം തുടര്‍ന്നതിനെ തുടര്‍ന്ന് ഇവര്‍ ബലം പ്രയോഗിച്ച് പുറത്തിറക്കുകയായിരുന്നു.
തന്നെ പറഞ്ഞ ജോലി തരാതെ പറ്റിച്ച ജിദ്ദയിലെ കമ്പനിക്കെതിരെയായിരുന്നു ഇയാളുടെ പ്രതിഷേധം.