ഹൈദരാബാദ്: ഡല്‍ഹിയില്‍ കോംഗോ വിദ്യാര്‍ഥി കൊല്ലപ്പെട്ടതിനു പിന്നാലെ ഹൈദരാബാദില്‍ നൈജീരിയന്‍ വിദ്യാര്‍ഥിക്കും മര്‍ദനം. വാഹന പാര്‍ക്കിങ് തര്‍ക്കത്തെത്തുടര്‍ന്ന് 23കാരനായ നൈജീരിയന്‍ വിദ്യാര്‍ഥി ഖസീമിനാണ് മര്‍ദനമേറ്റത്. സംഭവത്തില്‍ ഹൈദരാബാദ് സ്വദേശി മുഹമ്മദ് ഗഫൂറിനെ പൊലിസ് കസ്റ്റഡിയിലെടുത്തു. ഇതുസംബന്ധിച്ചു വിദേശകാര്യ മന്ത്രി സുഷമ സ്വരാജ് തെലങ്കാന സര്‍ക്കാരിനോട് റിപ്പോര്‍ട്ട് തേടിയിട്ടുണ്ട്. കഴിഞ്ഞ ദിവസം കോംഗോ സ്വദേശി എം.കെ ഒലിവര്‍ കൊല്ലപ്പെട്ടതിനെത്തുടര്‍ന്ന് ആഫ്രിക്കന്‍ വിദ്യാര്‍ഥികള്‍ ഡല്‍ഹിയില്‍ പ്രതിഷേധം സംഘടിപ്പിച്ചിരുന്നു.
ഇന്ത്യയില്‍ ആഫ്രിക്കന്‍ വിദ്യാര്‍ഥികള്‍ സുരക്ഷിതരല്ലെന്നാണ് ഇത്തരം സംഭവങ്ങള്‍ സൂചിപ്പിക്കുന്നതെന്ന് ആഫ്രിക്കന്‍ വിദ്യാര്‍ഥി അസോസിയേഷന്‍ ചെയര്‍മാന്‍ ഇമ്മാനുവേല്‍ ഒമുരുംഗ പ്രതികരിച്ചു.