ഇരിട്ടി:കൂട്ടുപുഴ മാക്കൂട്ടം ചുരം വഴി കര്‍ണാടകത്തിലേക്ക് കടത്താന്‍ ശ്രമിച്ച റേഷനരിയെന്നു സംശയിക്കുന്ന ഒരു ലോഡ് അരി ഇരിട്ടി പൊലിസ് പിടികൂടി.
വാഹനത്തില്‍ ഉണ്ടായിരുന്നവരുടെ പക്കല്‍ രേഖകളൊന്നുമില്ല. ഇരിട്ടി പൊലിസിന്റെ വാഹന പരിശോധനക്കിടെ ടാര്‍പോളിന്‍ പൊതിഞ്ഞു കെട്ടി അരിയുമായി എത്തിയ ലോറി പൊലിസ് സംഘം പരിശോധിക്കുകയായിരുന്നു. വാഹനത്തില്‍ ഉണ്ടായിരുന്ന ഡ്രൈവര്‍ ഉള്‍പ്പെടെയുള്ളവര്‍ക്ക് വ്യക്തമായ മറുപടി നല്‍കാന്‍ കഴിയാഞ്ഞതാണ് സംശയത്തിനിടയാക്കിയത്. അമ്പതു കിലോ വീതമുള്ള നൂറോളം ചാക്ക് അരിയായിരുന്നു ലോറിയിലുണ്ടായിരുന്നത്.
കര്‍ണാടകത്തിലെ അരി മൊത്തവിതരണക്കാര്‍ക്കു വേണ്ടി കേരളത്തിലെ വിവിധ മേഖലകളില്‍ നിന്നു റേഷനരികടത്തി കൊണ്ടുപോവുന്ന സംഘം പ്രവര്‍ത്തിക്കുന്നുണ്ടെന്ന ആരോപണങ്ങള്‍ നിലനില്‍ക്കവേയാണ് റേഷനരി എന്ന് സംശയിക്കുന്ന അരിയുമായി സംഘംപിടിയിലാവുന്നത്. കര്‍ണാടകം, തമിഴ്‌നാട്, ആന്ധ്ര തുടങ്ങിയ സംസ്ഥാനങ്ങളില്‍ നിന്നാണ് കേരളത്തിലേക്ക് സാധാരണയായി അരി എത്തിക്കുന്നത്. അതേസമയം കേരളത്തില്‍ നിന്നു കര്‍ണാടകത്തിലേക്ക് അരികൊണ്ടുപോവുന്നത് വിരളമാണ്. ഇതാണ് പൊലിസിന് സംശയത്തിനിടയാക്കിയത്. അരിയും വാഹനവും കസ്റ്റഡിയിയിലെടുത്ത് വിശദമായ അന്വേഷണം തുടങ്ങി.