ചെറുവത്തൂര്‍: മയ്യിച്ചയിലെ കുട്ടികള്‍ ഇനി ഉരലും പറയുമെല്ലാം കണ്ടുപഠിക്കും. കാലമാറ്റത്തില്‍ ഓര്‍മ്മയിലേക്ക് മറയുന്ന കാര്‍ഷികോപകരണങ്ങളുടെ മാതൃകകള്‍ ഒരുക്കിയിരിക്കുന്നത് മയ്യിച്ച ഗവ. എല്‍.പി സ്‌കൂളിലാണ്.
ഒന്ന് മുതല്‍ നാലുവരെയുള്ള ക്ലാസുകളില്‍ കുട്ടികള്‍ക്ക് കാര്‍ഷികോപകരണങ്ങളെ കുറിച്ച് പഠിക്കാനുണ്ട്. പലതും നാട്ടില്‍ കാണാനില്ല. ഈ സാഹചര്യത്തിലാണ് സ്‌കൂള്‍ മുറ്റത്ത് കലപ്പയും, മുറവും,ഉരലുമെല്ലാം സിമന്റില്‍ നിര്‍മ്മിച്ചത്. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായാണ് ഇങ്ങനെയൊരു ആലോചന നടന്നത്. മയ്യിച്ചയിലെ എം.പി ശിവദാസന്റെ കരവിരുതിലാണ് മാതൃകകള്‍ ഒരുങ്ങിയത്.
പാഠപുസ്തകങ്ങളിലെ ചിത്രങ്ങള്‍ ശില്‍പങ്ങളായി കണ്‍മുന്നില്‍ എത്തിയപ്പോള്‍ കുട്ടികളിലും കൗതുകം. സ്‌കൂള്‍ പിടിഎയുടെ നേതൃത്വത്തില്‍ ജനകീയ കൂട്ടായ്മയോടെയായിരുന്നു ശില്‍പനിര്‍മാണം.