രാജപുരം: നിര്‍ദ്ദിഷ്ട കാഞ്ഞങ്ങാട് കാണിയൂര്‍ റെയില്‍പ്പാതയുടെ സംയുക്ത സര്‍വേ റിപ്പോര്‍ട്ട് ചെന്നൈയിലെ ദക്ഷിണ റയില്‍വേ ആസ്ഥാനത്തെത്തി മാസങ്ങള്‍ കഴിഞ്ഞിട്ടും തുടര്‍ നടപടികള്‍ ഉണ്ടാകാത്ത സാഹചര്യത്തില്‍ തടസങ്ങള്‍ പരിഹരിക്കുവാന്‍ കേന്ദ്ര മന്ത്രി സദാനന്ദ ഗൗഡ വീണ്ടും മുന്‍കൈയെടുക്കുന്നു. കഴിഞ്ഞ ദിവസം മന്ത്രിയെ കണ്ട റെയില്‍വേ പാത ആക്ഷന്‍ കമ്മിറ്റിക്കാണ് മന്ത്രി ഉറപ്പ് നല്‍കിയത്.
ബന്ധപ്പെട്ട എല്ലാവരുമായും ചര്‍ച്ച ചെയ്ത് കാഞ്ഞങ്ങാട് കാണിയൂര്‍ റെയില്‍വേ പാത യാഥാര്‍ഥ്യമാക്കാന്‍ നടപടിയെടുക്കുമെന്ന് മന്ത്രിക്കൊപ്പമുണ്ടായിരുന്ന ഉഡുപ്പി ചിക്ക് മംഗ്ലൂര്‍ എം.പി. ശോഭ കലന്തലാജെയും ഉറപ്പ് നല്‍കി.
ഏഴ് മണിക്കൂറിനകം ബംഗലൂരുവിലെത്താന്‍ കഴിയുന്ന കാഞ്ഞങ്ങാട് കാണിയൂര്‍ പാതക്ക് കേന്ദ്ര മാനദണ്ഡമനുസരിച്ച് പകുതി വിഹിതം പാത കടന്ന് പോകുന്ന കേരള കര്‍ണാടക സംസ്ഥാന സര്‍ക്കാരുകള്‍ വഹിക്കണം. കേരള സര്‍ക്കാര്‍ അനുകൂലമായ തീരുമാനമെടുത്ത് കഴിഞ്ഞ ബജറ്റില്‍ കാണിയൂര്‍ പാതക്ക് തുക വകയിരുത്തിയിരുന്നു. എന്നാല്‍ കര്‍ണാടക സര്‍ക്കാര്‍ ഇനിയും തീരുമാനം എടുത്തിട്ടില്ല. കര്‍ണാടക മുഖ്യമന്ത്രിയുമായി സംസാരിച്ച് സംസ്ഥാന വിഹിതം അനുവദിക്കാന്‍ സമ്മര്‍ദ്ദം ചെലുത്തുമെന്ന് മന്ത്രി ഗൗഡ പറഞ്ഞു. സര്‍വേ റിപ്പോര്‍ട്ട് ചെന്നെയില്‍ ദക്ഷിണ റെയില്‍വേ ആസ്ഥാനത്ത് എത്തിയെങ്കിലും റെയില്‍വേ ബോര്‍ഡിന് മുമ്പാകെ റിപ്പോര്‍ട്ട് സമര്‍പ്പിച്ചിട്ടില്ല. ദക്ഷിണ റെയില്‍വേയുടെ ഉയര്‍ന്ന ഉദ്യോഗസ്ഥരുമായി തല്‍സമയം ഫോണില്‍ ബന്ധപ്പെട്ട് റിപോര്‍ട്ട് റെയില്‍വേ ബോര്‍ഡിന് സമര്‍പിക്കാനുള്ള തടസങ്ങള്‍ എന്താണെന്ന് മന്ത്രി ഗൗഡ ആരാഞ്ഞു. റിപോര്‍ട്ടിന്റെ വിശദാംശങ്ങള്‍ ഉടന്‍ തന്നെ തനിക്ക് നല്‍കണമെന്ന് ഉദ്യോഗസ്ഥരോട് ആവശ്യപ്പെട്ടു.
കാഞ്ഞങ്ങാട് കാണിയൂര്‍ റെയില്‍വേ പാത ആക്ഷന്‍ കമ്മിറ്റി ചെയര്‍മാന്‍ സുള്ള്യ നഗര പഞ്ചായത്ത് പ്രസിഡന്റ് രാമചന്ദ്ര, കാഞ്ഞങ്ങാട് മര്‍ച്ചന്റ്‌സ് അസോസിയേഷന്‍ പ്രസിഡന്റ് സി. യൂസഫ് ഹാജി, സുള്ള്യ ചേംബര്‍ ഓഫ് കൊമേഴ്‌സ് പ്രസിഡന്റ് സുധാകരറായ്, സി.എ. പീറ്റര്‍, ടി. മുഹമ്മദ് അസ്ലം, ജോസ് കൊച്ചുകുന്നേല്‍, എ. ദാമോദരന്‍, എ ഹമീദ്ഹാജി, കുഞ്ഞിക്കണ്ണന്‍ കക്കാണത്ത്, എം.ബി.എം. അഷറഫ്, സൂര്യനാരായണഭട്ട്, എം.വി. ഭാസ്‌ക്കരന്‍ എന്നിവരാണ് കേന്ദ്ര മന്ത്രി ഗൗഡയേയും ശോഭ കറന്തലാജ എം. പിയേയും കണ്ട് നിവേദനം നല്‍കിയത്.