മലപ്പുറം: കേരളാ പൊലിസ് അസോസിയേഷന്‍ ജില്ലാ കമ്മറ്റിയുടെ ആഭിമുഖ്യത്തില്‍ ലഹരിവിരുദ്ധ കാംപയിന്‍ 'സ്‌നേഹദൂത് ' ഇന്നലെ ജില്ലയിലെ 35 സ്‌കൂളുകളില്‍ തുടങ്ങി. ജില്ലാതല ഉദ്ഘാടനം തിരൂര്‍ ഏഴൂര്‍ എച്ച്.എസ്.എസില്‍ നിയമസഭാ സ്പീക്കര്‍ പി. ശ്രീരാമകൃഷ്ണന്‍ നിര്‍വഹിച്ചു.
സി. മമ്മുട്ടി എം.എല്‍.എ അധ്യക്ഷനായി. മലപ്പുറത്ത് പി. ഉബൈദുല്ല എം.എല്‍.എ, പെരിന്തല്‍മണ്ണയില്‍ മഞ്ഞളാംകുഴി അലി എം.എല്‍.എ, കരിപ്പൂരില്‍ പി. അബ്ദുല്‍ഹമീദ് എം.എല്‍.എ, തൃക്കാവ് ജി.എച്ച്.എസ്.എസില്‍ പൊന്നാനി നഗരസഭാ ചെയര്‍മാന്‍ സി.പി മുഹമ്മദ്കുഞ്ഞി, മൂക്കുതല ഹൈസ്‌കൂളില്‍ നന്നംമുക്ക് പഞ്ചായത്ത് പ്രസിഡന്റ് ടി. സത്യന്‍, വന്നേരി എച്ച്.എസ്.എസില്‍ പെരുമ്പടപ്പ് ബ്ലോക്ക് പ്രസിഡന്റ് പി.എം ആറ്റുണ്ണി തങ്ങള്‍ എന്നിവര്‍ ഉദ്ഘാടനം ചെയ്തു. വിദ്യാലയ പരിസരങ്ങളിലെ ലഹരി ഉപയോഗത്തെയും വില്‍പനയെയും കുറിച്ച് വിദ്യാര്‍ഥികള്‍ക്കും പൊതുജനങ്ങള്‍ക്കും 34 പൊലിസ് സ്റ്റേഷനുകളിലും സ്ഥാപിക്കുന്ന തപാല്‍പെട്ടികളിലേക്ക് സ്‌നേഹദൂത് പരാതി അയക്കാം. അയക്കുന്ന ആളിന്റെ പേരോ വിലാസമോ എഴുതേണ്ടതില്ല.