വാടാനപ്പള്ളി: സമുദായത്തിന് മാതൃകയാവുകയും നേതൃത്വം നല്‍കുകയും ചെയ്ത സമസ്തയുടെ പണ്ഡിതരുടെ വിയോഗം കാലത്തിന് നികത്താന്‍ കഴിയാത്തതാണെന്ന് വാടാനപ്പള്ളി റെയ്ഞ്ച് പ്രസിഡന്റ് എ.ടി.എം ഫൈസി അഭിപ്രായപ്പെട്ടു. റെയ്ഞ്ച് സംഘടിപ്പിച്ച കുമരംപുത്തൂര്‍ ഉസ്താദ് കോട്ടുമല ഉസ്താദ് അനുസ്മരണ സമ്മേളനത്തില്‍ മുഖ്യ പ്രഭാഷണം നടത്തുകയായിരുന്നു അദ്ദേഹം. സമസ്ത പണ്ഡിതര്‍ സമുദായത്തെ സേവിച്ചവരാണ്. അതിനു വേണ്ടി സ്വന്തം ആരോഗ്യവും സമ്പത്തും മാറ്റിവെച്ചവരാണ്. അവരുടെ സൂക്ഷ്മതയും ജീവിത വിശുദ്ധിയും മാതൃകയാണ്. പുതിയ തലമുറക്ക് ദീനിന്റെ വെളിച്ചം തെളിച്ചവരാണ് അവര്‍. അവരുടെ പ്രവര്‍ത്തന മേഖലകള്‍ നമ്മെ അത്ഭുതപ്പെടുത്തുകയാണ്. അദ്ദേഹം പറഞ്ഞു. റെയ്ഞ്ച് ചെയര്‍മാന്‍ എ.എ ജാഫര്‍ മാസ്റ്റര്‍ അധ്യക്ഷനായി. എ.എ അബ്ദുല്‍ ജബ്ബാര്‍, കെ.അബ്ദുല്‍ കരീം ദാരിമി, യൂസുഫ് മുസ്ലിയാര്‍, സി.എം ശിഹാബുദീന്‍, നൂറുദ്ദീന്‍ യമാനി എന്നിവര്‍ പ്രസംഗിച്ചു.