ചെന്നൈ: സയ്യിദ് മുഷ്താഖ് അലി ടി20 ക്രിക്കറ്റ് ടൂര്‍ണമെന്റില്‍ കേരളത്തിന് തോല്‍വി. ഹൈദരാബാദിനെതിരേ അഞ്ചു റണ്‍സിനാണ് തോല്‍വി വഴങ്ങിയത്. ഹൈദരാബാദ് ഉയര്‍ത്തിയ 127 റണ്‍സ് വിജയലക്ഷ്യം പിന്തുടര്‍ന്ന കേരളത്തിന് ഏഴു വിക്കറ്റ് നഷ്ടത്തില്‍ 121 റണ്‍സെടുക്കാനേ സാധിച്ചുള്ളൂ.

സ്‌കോര്‍ പിന്തുടര്‍ന്ന കേരളത്തിന് മികച്ച തുടക്കമാണ് ലഭിച്ചത്. വിഷ്ണു വിനോദ്(37) ജലജ് സക്‌സേന(34) എന്നിവര്‍ ചേര്‍ന്ന് 56 പന്തില്‍ 60 റണ്‍സ് ചേരപ്ത്തു. വിഷ്ണു മൂന്നു ബൗണ്ടറിയും രണ്ടു സിക്‌സറും പറത്തിയപ്പോള്‍ ജലജിന്റെ ഇന്നിങ്‌സില്‍ മൂന്നു ബൗണ്ടറിയുണ്ടായിരുന്നു. വിഷ്ണു പുറത്തായ ശേഷമെത്തിയ സഞ്ജു സാംസണ്‍(27) സ്‌കോര്‍ ഉയര്‍ത്തിയെങ്കിലും വലിയ ഇന്നിങ്‌സ് കളിക്കുന്നതില്‍ പരാജയപ്പെട്ടു.
16 ഓവറില്‍ രണ്ടിന് 100 എന്ന നിലയില്‍ നിന്നാണ് കേരളം തോല്‍വിയിലേക്ക് വീണത്. അവസാന നാലോവറില്‍ അഞ്ചു വിക്കറ്റ് നഷ്ടമായ കേരളത്തിന് 21 റണ്‍സ് മാത്രമാണ് ചേര്‍ക്കാനായത്.