ഇന്ത്യയെന്ന മഹാരാജ്യത്തെ അറബ് സമൂഹവുമായി ബന്ധം ഊട്ടിയുറപ്പിക്കുന്നതില്‍ ഏറെ പങ്കു വഹിച്ചയാളായിരുന്നു ഇ. അഹമ്മദ്. ഇന്ത്യയുടെ യശസ്സ് ആഗോളതലത്തില്‍ ഉയര്‍ത്തിയപ്പോഴും അറബ് ഭരണാധികാരികളുമായും അറബ് സമൂഹവുമായും അദ്ദേഹം എന്നും അഗാധമായ ബന്ധമായിരുന്നു പുലര്‍ത്തിയിരുന്നത്. ഈ ബന്ധം കണ്ടാണ് ഇന്ത്യന്‍ ഭരണകൂടം വിദേശകാര്യ വിഷയങ്ങളില്‍ പലപ്പോഴും അദ്ദേഹത്തെ പല പ്രതിസന്ധിഘട്ടങ്ങളില്‍ ഇതിനായി നിയോഗിക്കപ്പെട്ടത്. ഇതേ ബന്ധം മൂലമാണ് നാല് തവണ ഇന്ത്യയെ പ്രതിനിധീകരിച്ചു അറബ് ലീഗിലും പങ്കെടുത്തത്. ഇത് തന്നെയാണ് ഇദ്ദേഹവും അറബ് ലോകവും ഇന്ത്യയും തമ്മിലുള്ള ബന്ധം വിളിച്ചോതുന്നതും. കൂടാതെ, 2000ല്‍ ജോര്‍ദാനിലെ അമ്മാനിലെ ഇന്ത്യന്‍ ലോക പാര്‍ലമെന്ററി സമ്മേളനത്തിലും രാജ്യത്തെ പ്രതിനിധീകരിച്ചു. 2004ല്‍ ഫലസ്തീനിലെ ഇസ്രാഈലിന്റെ കിരാതനീക്കങ്ങള്‍ക്കിടെ റാമല്ലയിലെ ഫലസ്തീന്‍ ചരിത്ര പുരുഷനായിരുന്ന യാസര്‍ അറാഫത്തിനെ ചെന്ന് സന്ദര്‍ശനം നടത്തിയത് ചരിത്രത്തില്‍ ഇന്നും ഉല്ലേഖനം ചെയ്യപ്പെട്ട ഇന്ത്യ അറബ് ബന്ധത്തിന്റെ തങ്ക ലിപികളാണ്.

1984ല്‍ കേരള വ്യവസായ മന്ത്രിയായിരിക്കെ ഗള്‍ഫ് രാജ്യങ്ങളിലേക്കുള്ള ഇന്ത്യന്‍ ഉന്നതതല സംഘത്തെ നയിക്കാന്‍ ഇന്ദിരഗാന്ധി നിയോഗിച്ചതോടെയാണ് അഹമ്മദ് ഗള്‍ഫ് രാജ്യങ്ങളുമായി ബന്ധം കൂടുതല്‍ ശക്തമായത്. 1997 ലെ മക്കയിലെ മിന ദുരന്തകാരണം കണ്ടെത്തുന്ന സംഘത്തെ നയിച്ചതും ഇ അഹമ്മദാണെന്ന സത്യം പലര്‍ക്കും അറിയില്ല. ഇങ്ങനെ നിരവധി വിദേശ, വിശിഷ്യാ അറബ് ലോകവുമായുള്ള കൂടിക്കാഴ്ചക്ക് ഇ അഹമ്മദ് രാജ്യത്തിന് വേണ്ടി സംഭാവനകള്‍ നിരവധിയാണ്.

ഇതേ ബന്ധത്തിന്റെ പേരിലാണ് ഗള്‍ഫ് യുദ്ധത്തിന് ശേഷം കുവൈത്ത് നാഷണല്‍ അസംബ്ലി സന്ദര്‍ശിച്ച ലോക രാജ്യങ്ങളില്‍ നിന്നുള്ള രണ്ടാമത്തെ പ്രതിനിധിയായും തിരഞ്ഞെടുക്കപ്പെട്ടത്. 'രാജ്യം നഷ്ടപ്പെട്ട അലഞ്ഞ ഞങ്ങള്‍ക്ക് ഐക്യദര്‍ഢ്യം പ്രകടിപ്പിച്ച മഹാനായ താങ്കളെ ഒരിക്കലും മറക്കില്ലെന്നാണ്' കുവൈത്ത് അമീര്‍ അഹമ്മിനോട് അന്ന് പറഞ്ഞത്. കൂടാതെ ഇറാഖില്‍ ഇന്ത്യക്കാരെ തട്ടിക്കൊണ്ടു പോയി തടവിലാക്കിയപ്പോഴും സോമാലിയയിലും മറ്റു രാജ്യങ്ങളിലും പ്രക്ഷോഭങ്ങളില്‍ തടവിലായ ഇന്ത്യക്കാരെ രക്ഷിക്കുന്നതിനായി ഇദ്ദേഹം നടത്തിയ സാഹസിക നീക്കം അന്ന് ഏവരുടെയും ശ്രദ്ധ പിടിച്ചു പറ്റിയതാണ്. അറബ് ലോകവുമായുള്ള ബന്ധമാണ് ഇവിടെയും സഹായകരമായത്. ഇതില്‍ ഏറ്റവും ശ്രദ്ധേയമായ നീക്കങ്ങളില്‍ ഒന്നായിരുന്നു മലയാളിയായ നൗഷാദിന്റെ കണ്ണു ചൂഴ്‌ന്നെടുക്കാന്‍ സഊദി ശരീഅത്ത് കോടതി 2006 വിധി പുറപ്പെടുവിച്ചപ്പോള്‍, ഇ അഹമ്മദ് നടത്തിയ നീക്കങ്ങള്‍ മൂലം വിധിക്കെതിരെ നീങ്ങി അദ്ദേഹത്തെ രക്ഷപ്പെടുത്തിയത് മലയാളികളുടെ മനസ്സില്‍ ഇന്നും മായാതെ കിടക്കുകയാണ്.

സഊദിയുമായി ചര്‍ച്ച നടത്തിയത് മൂലം ഹജ്ജ് ക്വാട്ട വര്‍ധിപ്പിച്ചത് എടുത്തു പറയേണ്ട കാര്യമാണ്. 2004 വരെ വെറും 72,000 മാത്രമുണ്ടായിരുന്ന ഹജ്ജ് ക്വാട്ട തന്റെ ശ്രമഫലമായി 1,70,000 ആയി കൂട്ടാന്‍ സഊദി അറേബ്യയെ പ്രേരിപ്പിച്ചതും അദ്ദേഹമാണ്. കൂടാതെ, ഫലസ്തീന്‍ വിഷയത്തിലും ഗള്‍ഫ് രാജ്യങ്ങളിലെ ഇന്ത്യക്കാരുടെ വിവിധ പ്രശ്‌നങ്ങള്‍ക്ക് പരിഹാരം കാണുന്നതില്‍ അഹമ്മദ് പ്രയത്‌നിച്ചു. അറബ്, വിദേശ രാജ്യങ്ങളിലെ ഭരണാധികാരികളുമായി ഉള്ള ബന്ധത്തിന്റെ ഫലമായാണ് വിദേശകാര്യ മന്ത്രി പദവും അദ്ദേഹത്തെ തേടിയെത്തിയത്. സഊദിയുമായും സഊദി ഭരണാധികാരികളുമായും അഭേദ്യമായ ബന്ധമുണ്ടായിരുന്ന അദ്ദേഹം അഞ്ചു തവണ ഇന്ത്യന്‍ സര്‍ക്കാരിന്റെ ഔദ്യോഗികസംഘത്തിലെ അംഗമായിരുന്നു.