കോഴിക്കോട്: സമസ്ത കേരള ജംഇയ്യത്തുല്‍ മുഅല്ലിമീന്‍ ജില്ലാ ഇസ്്‌ലാമിക കലാമേള ഏപ്രില്‍ മൂന്നിന് കുറ്റിക്കാട്ടൂര്‍ ജാമിഅ യമാനിയ്യ അറബിക് കോളജില്‍ നടക്കും. റെയ്ഞ്ച് മത്സരങ്ങള്‍ക്ക് ശേഷമുള്ള മേഖലാ മത്സരങ്ങള്‍ അഞ്ചിന് എലത്തൂരില്‍ തുടക്കമാവും. ഈ മാസം 12ന് വടകര മേഖലാ മത്സരം തോടന്നൂരും താമരശ്ശേരി മേഖലാ മത്സരം കൊടുവള്ളി മദ്‌റസാ ബസാറിലും നടക്കും. 19ന് കുറ്റ്യാടി മേഖലയിലേത് ഭൂമിവാതുക്കള്‍ നൂറുല്‍ ഹുദാ മദ്‌റസയിലും കോഴിക്കോട് മേഖലാ മത്സരങ്ങള്‍ അരീക്കാട് അന്‍വാറുല്‍ ഇസ്്‌ലാം മദ്‌റസയിലും നടക്കും. മാവൂരിലേത് ഈ മാസം 26 നും നടക്കുന്നതോടെ മേഖലാ മത്സരങ്ങള്‍ക്ക് സമാപനമാവും.
എസ്.കെ.ജെ.എം ജില്ലാ സെക്രട്ടറിയേറ്റ് യോഗം മുഅല്ലിം സെന്ററില്‍ പ്രസിഡന്റ് കെ.കെ ഇബ്രാഹീം മുസ്്‌ലിയാരുടെ അധ്യക്ഷതയില്‍ ചേര്‍ന്നു. വിദ്യാര്‍ഥിനികളുടെ സുകൃതം മാഗസിന്‍ അറബി-മലയാള കൈയെഴുത്ത് മത്സരം മേഖലാ തലത്തില്‍ നടത്തുവാന്‍ അഭ്യര്‍ഥിച്ചു. സൈനുല്‍ ആബിദീന്‍ തങ്ങള്‍, ആര്‍.വി അബ്ബാസ് ദാരിമി, ഇ.കെ അബ്ദുല്ല ഫൈസി, അംജദ്ഖാന്‍ റഷീദി, പി. ലിയാഖത്തലി ദാരിമി, പി.കെ അബ്ദുല്ല ബാഖവി, കെ.കെ മുസ്തഫ ഹസനി സംസാരിച്ചു. പി. ഹസൈനാര്‍ ഫൈസി സ്വാഗതവും കെ. കുഞ്ഞായിന്‍ മുസ്്‌ലിയാര്‍ നന്ദിയും പറഞ്ഞു.