മീനങ്ങാടി: പൊതുവിദ്യാലയങ്ങളെ അന്താരാഷ്ട്ര നിലവാരത്തിലേക്ക് ഉയര്‍ത്താനുള്ള യജ്ഞം വിദ്യാഭ്യാസരംഗത്ത് വിപ്ലവകരമായ പരിവര്‍ത്തനങ്ങള്‍ക്ക് നാന്ദി കുറിക്കുമെന്ന് പ്രതിപക്ഷ നേതാവ് രമേശ് ചെന്നിത്തല പ്രസ്താവിച്ചു.
സര്‍ക്കാര്‍ വിദ്യാലയങ്ങളിലെത്തുന്ന സാധാരണക്കാരുടെ കുട്ടികള്‍ക്ക് വിദേശരാജ്യങ്ങളിലെ മികച്ച വിദ്യാഭ്യാസ സ്ഥാപനങ്ങളിലെ കുട്ടികളുടെ നിലവാരത്തിലേക്കുയരാനും ഏതു മത്സര പരീക്ഷകളിലും വിജയിക്കാനും സാധിക്കണം.
ഇതിനുള്ള ശേഷി കൈവരുത്തുകയാണ് പുതിയ സംരംഭത്തിന്റെ ലക്ഷ്യം. അതിനാല്‍ സര്‍ക്കാരിനോടൊപ്പം എല്ലാ വിഭാഗം ജനങ്ങളും ഒരുമിച്ച് പ്രവര്‍ത്തിക്കണമെന്ന് അദ്ദേഹം ആവശ്യപ്പെട്ടു. മീനങ്ങാടി ഗവ. ഹയര്‍സെക്കന്‍ഡറി സ്‌കൂളിനെ അന്താരാഷ്ട്ര നിലവാരത്തിലേക്കുയര്‍ത്താനുള്ള പദ്ധതിയുടെ ഔദ്യോഗിക പ്രഖ്യാപനം സ്‌കൂള്‍ ഓഡിറ്റോറിയത്തില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.
ഐ.സി ബാലകൃഷ്ണന്‍ എം.എല്‍.എ അധ്യക്ഷനായി. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി, വൈസ് പ്രസിഡന്റ് പി.കെ അസ്മത്ത്, വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ ദേവകി, ഹയര്‍സെക്കന്‍ഡറി റീജണല്‍ ഡെപ്യൂട്ടി ഡയറക്ടര്‍ എസ് ജയശ്രീ, ജില്ലാ വിദ്യാഭ്യാസ ഓഫിസര്‍ കെ പ്രഭാകരന്‍, മിനി ജോണ്‍സണ്‍, മിനി സാജു, മനോജ് ചന്ദനക്കാവ്, കെ.കെ വര്‍ഗീസ്, ബേബി വര്‍ഗീസ്, വി മോഹനന്‍, സി.കെ സൈതലവി ഹാജി, സജി കാവനാക്കുടി, എ.എഫ് ടെംസി, പി.ഒ ബിനോയി, ഡോ. മാത്യു തോമസ്, പി.ടി ജോസ്, എ.കെ അനില്‍കുമാര്‍, മെറില്‍ ചാള്‍സ്, യു.ബി ചന്ദ്രിക, ഷീജ രഘുനാഥ്, എ.വി ജയലക്ഷ്മി, ടി.എം ഹൈറുദ്ദീന്‍ സംസാരിച്ചു. തിരുവനന്തപുരം ഹാബിറ്റാറ്റ് ഗ്രൂപ്പ് പ്രൊജക്ട് എന്‍ജിനീയര്‍ അജിത് കെ ജോസഫ് പദ്ധതിയുടെ മാസ്റ്റര്‍പ്ലാന്‍ ജില്ലാ പഞ്ചായത്ത് പ്രസിഡന്റ് ടി ഉഷാകുമാരിക്ക് കൈമാറി. സര്‍വിസില്‍ നിന്നും വിരമിക്കുന്ന പ്രിന്‍സിപ്പാള്‍ യു.ബി ചന്ദ്രിക, ഹെഡ്മിസ്ട്രസ് ഷീജാ രഘുനാഥ്, ഓഫിസ് അസിസ്റ്റന്റ് എ.വി ജയലക്ഷ്മി, ജിവകാരുണ്യ മേഖലയില്‍ മാതൃക കാണിച്ച ഫാ. ഷിബു കുറ്റിപറിച്ചേല്‍, കോഴിക്കോട് സര്‍വകലാശാലയില്‍ നിന്നും പി.എച്ച്.ഡി നേടിയ അധ്യപകന്‍ ബാവ കെ പാലുകുന്ന് എന്നിവരെ ചടങ്ങില്‍ ആദരിച്ചു.
സംസ്ഥാന തലത്തിലെ വിവിധ മേളകളില്‍ ഉയര്‍ന്ന ഗ്രേഡ് നേടിയ പ്രതിഭകളെ അനുമോദിച്ചു. സ്‌കൂളിന്റെ അമ്പത്തിയൊമ്പതാം വാര്‍ഷികത്തിന്റെ ഭാഗമായി വിവിധ കലാപരിപാടികളും അരങ്ങേറി.