ലണ്ടന്‍: ആഴ്‌സണല്‍ പരിശീലകന്‍ ആഴ്‌സന്‍ വെങര്‍ക്ക് മൂന്ന് മത്സരങ്ങളില്‍ വിലക്കും പിഴയും. വെസ്റ്റ് ബ്രോമിനെതിരായ മത്സരത്തില്‍ റഫറി മൈക് ഡീന്‍ പെനാല്‍റ്റി വിധിച്ചത് ചോദ്യം ചെയ്തതിനാണ് ഇംഗ്ലീഷ് ഫുട്‌ബോള്‍ അസോസിയേഷന്‍ ശിക്ഷ വിധിച്ചത്.
വിലക്കിനൊപ്പം 40,000 പൗണ്ടാണ് വെങര്‍ പിഴ കെട്ടേണ്ടത്. വെസ്റ്റ് ബ്രോമിനനുകൂലമായി പെനാല്‍റ്റി വിധിച്ചതിനെതിരേ വെങര്‍ റഫറിയോട് തര്‍ക്കിച്ചിരുന്നു. കഴിഞ്ഞ സീസണിലും സമാനമായി വെങര്‍ വിലക്ക് നേരിട്ടിരുന്നു. നോട്ടിങാമിനെതിരായ എഫ്.എ കപ്പ്, ചെല്‍സിക്കെതിരായ ലീഗ് കപ്പ് സെമി, ബേണ്‍മൗത്തിനെതിരായ പ്രീമിയര്‍ ലീഗ് പോരാട്ടങ്ങളാണ് വെങര്‍ക്ക് നഷ്ടമാകുക.