തേഞ്ഞിപ്പലം: അഖിലേന്ത്യ അന്തര്‍സര്‍വകാലാശാല പുരുഷ ഫുട്‌ബോള്‍ ചാംപ്യഷിപ്പില്‍ കാലിക്കറ്റ് സര്‍വകലാശാല പത്താം തവണയും കിരീടം സ്വന്തമാക്കി. ഇന്നലെ വൈകിട്ട് നടന്ന ഫൈനല്‍ മത്സരത്തില്‍ കാലിക്കറ്റ് സര്‍വകലാശാല മറുപടിയില്ലാത്ത ഒറ്റ ഗോളിന് പഞ്ചാബി സര്‍വകലാശാല പട്യാലയെ വീഴ്ത്തി കിരീടം സ്വന്തമാക്കുകയായിരുന്നു.
കളിയുടെ മുഴുവന്‍ സമയത്ത് ഇരു ടീമുകളും ഗോളടിച്ചില്ല. അധിക സമയത്ത് കാലിക്കറ്റിന്റെ അഫ്ദലിന്റെ മുന്നേറ്റത്തെ ബോക്‌സില്‍ വച്ച് ഗുരീന്ദര്‍ പല്‍ സിങ് ഫൗള്‍ ചെയ്ത് വീഴ്ത്തിയതിന് ലഭിച്ച പെനാല്‍റ്റി മുഹമ്മദ് ഇനസ് റഹ്മാന്‍ വലയിലാക്കി കാലിക്കറ്റിന് വിജയമൊരുക്കുകയായിരുന്നു. ചാംപ്യന്‍ഷിപ്പില്‍ മൂന്നാം സ്ഥാനം കണ്ണൂര്‍ സര്‍വകലാശാല നേടി. പഞ്ചാബ് സര്‍വകലാശാല ചണ്ഡീഗഢിനെ പെനാല്‍റ്റി ഷൂട്ടൗട്ടില്‍ 6-5ന് വീഴ്ത്തിയാണ് കണ്ണൂര്‍ വിജയിച്ചത്. നിശ്ചിത സമയത്ത് മത്സരം 1-1ന് തുല്ല്യത പാലിച്ചിരുന്നു.
ടൂര്‍ണമെന്റിലെ താരങ്ങള്‍: പ്രോമിസിങ് പ്ലയെര്‍- മുഹമ്മദ് റിസ്‌വാന്‍ അലി (കണ്ണൂര്‍ സര്‍വകലാശാല), മികച്ച പ്രതിരോധ താരം- ഗുരീന്ദര്‍ പല്‍ സിങ് (പഞ്ചാബി സര്‍വകലാശാല), മികച്ച ഗോള്‍ കീപ്പര്‍- അഭിനവ്, മികച്ച കളിക്കാരന്‍- അഫ്ദല്‍ (കാലിക്കറ്റ് സര്‍വകലാശാല).