കാഞ്ഞിരപ്പള്ളി: ചികില്‍സയ്ക്കായി ആശുപത്രിയിലേക്ക് കൊണ്ടുപോകുന്ന വഴി പൊലിസിനെ വെട്ടിച്ചുകടന്ന പ്രതിയെ മണിക്കൂറുകള്‍ക്കകം പിടികൂടി. ഇന്നലെ രാവിലെ പൊന്‍കുന്നം സബ് ജയിലില്‍ വിചാരണ തടവില്‍ കഴിയുന്ന മൂന്നു പ്രതികളെ ചികിത്സയ്ക്കായി കാഞ്ഞിരപ്പള്ളി ഗവ: ജനറല്‍ ആശുപത്രിയിലേക്കു കൊണ്ടുപോകുന്നതിനിടെയാണ് സംഭവം.
പൊന്‍കുന്നം സബ് ജയിലില്‍ വിചാരണ തടവില്‍ കഴിയുന്ന പ്രതികളായ രാജു, അരവിന്ദ്, അബ്ദുള്‍ഖാദര്‍ എന്നിവരെ ജില്ലാ പൊലിസ് ആസ്ഥാനത്ത് നിന്ന് നിയോഗിച്ച സി.പി.ഒമാരായ പ്രഭു.കെ.ശിവറാം, നിഷാന്ത് കെ.എസ്, അഖിലേഷ് എന്നിവരോടൊപ്പമാണ് രാവിലെ ചികിത്സയ്ക്കായി കാഞ്ഞിരപ്പള്ളി ഗവ: ജനറല്‍ ആശുപത്രിയിലേക്കയച്ചത്.
ഡോക്ടറെ കാണിച്ച് മടങ്ങാനായി കുന്നുംഭാഗത്ത് നിന്ന് പ്രതികളെ ബസില്‍ കയറ്റുന്നതിനിടെ എരുമേലി സ്വദേശിയായ അരവിന്ദ് കൈവിലങ്ങ് ഊരി കൂടെയുണ്ടായിരുന്ന പൊലിസുകാരെ വെട്ടിച്ച് ഓടിയത്. തുടര്‍ന്ന് അതുവഴി വന്ന നമ്പരില്ലാത്ത ആക്ടീവ സ്‌കൂട്ടറുമായി രക്ഷപെട്ടു.
സി.പി.ഒമാര്‍ നല്‍കിയ വിവരത്തിന്റെ അടിസ്ഥാനത്തില്‍ പൊന്‍കുന്നം പൊലിസ് സ്റ്റേഷന്‍ കേന്ദ്രീകരിച്ച് അന്വേഷണം നടത്തുന്നതിനിടെ അരവിന്ദ് കാഞ്ഞിരപ്പള്ളി കോടതിയില്‍ കീഴടങ്ങുകയായിരുന്നു.
പ്രതിയെ രക്ഷപെടുന്നതിന് സഹായിച്ച എരുമേലി സ്വദേശിയായ അഖില്‍ പ്രസാദ് എന്നയാളെ കസ്റ്റഡിയില്‍ എടുത്തിട്ടുണ്ട്.