ബദിയടുക്ക: ഓംനി വാനില്‍ കടത്തുകയായിരുന്ന കര്‍ണാടക നിര്‍മിത മദ്യവുമായി മധ്യവയസ്‌കന്‍ പിടിയില്‍. കുണ്ടംകുഴിയിലെ ഇ ചന്ദ്രശേഖരന്‍ (48)നെയാണ് ബദിയടുക്ക എക്‌സൈസ് റെയ്ഞ്ച് അധികൃതര്‍ അറസ്റ്റു ചെയ്തത്.
കഴിഞ്ഞ ദിവസം രാത്രി ഏഴോടെ കേരള കര്‍ണാടക അതിര്‍ത്തിയിലെ ഏവന്തൂര്‍ എക്‌സൈസ് ചെക്ക് പോസ്റ്റിനു സമീപം വാഹന പരിശോധന നടത്തവേ അതു വഴി കടന്നു വന്ന വെള്ള നിറത്തിലുള്ള ഓംനി വാന്‍ തടഞ്ഞു നിര്‍ത്തി നടത്തിയ പരിശോധനയിലാണ് സീറ്റിനടയില്‍ പ്ലാസ്റ്റിക് കവറില്‍ സൂക്ഷിച്ച 750 മില്ലിയുടെ ഏഴ് കുപ്പി കര്‍ണാടക മദ്യം കണ്ടെത്തിയത്.
വാഹനം കസ്റ്റഡിയിലെടുത്ത് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
ബദിയടുക്ക എക്‌സൈസ് റെയ്ഞ്ച് അസിസ്റ്റന്റ് ഇന്‍സ്‌പെക്ടര്‍മാരായ യു ദിവാകരന്‍, റെന്നി ഫെര്‍ണാണ്ടസ്, സിവില്‍ എക്‌സൈസ് ഓഫിസര്‍ ഷാമില്‍ പരിശോധന സംഘത്തിലുണ്ടായിരുന്നു.