മൂവാറ്റുപുഴ: വിദ്യാര്‍ഥികളുമായി പോയ സ്‌കൂള്‍ ബസ് കെ.എസ്.ആര്‍.ടി.സി ബസുമായി ഇടിച്ച് 12 വിദ്യാര്‍ഥികളടക്കം 15 പേര്‍ക്ക് പരുക്കേറ്റു. പെരുമറ്റം വി.എം പബ്ലിക് സ്‌കൂള്‍ ബസാണ് അപകടത്തില്‍പെട്ടത്. വൈകിട്ട് നാല് മണിയോടെ പേഴയ്ക്കാപ്പിള്ളി എസ് വളവിലായിരുന്നു അപകടം.
സ്‌കൂള്‍ ബസ് എസ് വളവ് ലക്ഷം വീട് കോളനിപ്പടിയില്‍ വിദ്യാര്‍ഥിയെ ഇറക്കിയശേഷം അശ്രദ്ധമായി തിരിച്ചതാണ് അപകടകാരണമെന്ന് നാട്ടുകാര്‍ പറയുന്നു.
പാലക്കാട് നിന്നും വരികയായിരുന്നു കെ.എസ്.ആര്‍.ടി.സി ബസ്. സ്‌കൂള്‍ ബസിനെ രക്ഷപ്പെടുത്താന്‍ കെ.എസ്.ആര്‍.ടി.സി ഡ്രൈവര്‍ ശ്രമിച്ചുവെങ്കിലും തെന്നിമാറിയ ബസിന്റെ പിന്‍വശം ഇടിച്ച് സ്‌കൂള്‍ ബസ് മറിയുകയായിരുന്നു.
ഹന, ഫൈഹ, യാസിന്‍ മിസ് വരി, നസ്‌റിന്‍ സുല്‍ത്താന, ദിയ സെഹറിന്‍, മുഹമ്മദ് റിസ്‌വാന്‍, മുഹമ്മദ് അഫ്‌നാന്‍, മുഹമ്മദ് അദീബ് ഫൈസാന്‍, മുഹമ്മദ് അല്‍ ദിയാന്‍, അമീന എം.എസ്, മുഹമ്മദ് നബ്ഹാന്‍, വൈഷ്ണവ് റെജി, ഡ്രൈവര്‍ മൈതീന്‍, ആയമാരായ റൈഹാനത്ത്, സിന്ധു എന്നിവര്‍ക്കാണ് പരുക്കേറ്റത്. ആരുടേയും പരുക്കുകള്‍ ഗുരുതരമല്ല.