കൊച്ചി: ജൈകൃഷി പ്രോത്സാഹനവുമായി ബന്ധപ്പെട്ട പ്രവര്‍ത്തനങ്ങള്‍ക്ക് ഏര്‍പ്പെടുത്തിയ ജില്ലയിലെ മികച്ച ജൈവമണ്ഡലത്തിനുളള പുരസ്‌കാരം വാരപ്പെട്ടി ഗ്രാമപഞ്ചായത്തിന് ലഭിച്ചു. വാരപ്പെട്ടി കൃഷിഭവന്റെ നേതൃത്വത്തില്‍ നടത്തിയ വിവിധ പ്രവര്‍ത്തനങ്ങള്‍ക്കാണ് അവാര്‍ഡ് ലഭിച്ചത്.
വാരപ്പെട്ടി കൃഷിഭവന്‍ കാര്‍ഷിക കര്‍മസേന മുഖേന ജൈവകൃഷി വ്യാപിപ്പിക്കുന്നതിനായി വ്യാപകമായ പദ്ധതികളാണ് പഞ്ചായത്ത് പരിധിയില്‍ നടപ്പിലാക്കിയത്. വിത്തുമുതല്‍ വിപണിവരെ എന്ന ആശയം ഉള്‍ക്കൊണ്ടുകൊണ്ട് കര്‍മസേന മഴമറയില്‍ ഉല്‍പാദിപ്പിക്കുന്ന നടീല്‍വസ്തുക്കള്‍, വിത്തുകള്‍ എന്നിവ യഥാസമയം കര്‍ഷകര്‍ക്ക് ലഭ്യമാക്കുന്നു.
പരിശീലനം ലഭിച്ചിട്ടുളള കര്‍മസേനാംഗങ്ങള്‍ കൃഷി ഭവന്റെ മേല്‍നോട്ടത്തില്‍ മിത്രവളം, മണ്ണിരകമ്പോസ്റ്റ്, പച്ചിലവളം, പഞ്ചഗവ്യം, ബീജാമൃതം തുടങ്ങിയവ തയാറാക്കി നല്‍കി വരുന്നു.