പറവൂര്‍: മാഞ്ഞാലി തേലത്തുരുത്തില്‍ മാഞ്ഞാലി പാലത്തിന് സമീപം പുഴ പുറമ്പോക്ക് ഭൂമി കൈയേറിയിട്ടും അധികാരികള്‍ക്ക് നിസംഗതയെന്ന് ആരോപണം. ആധാരപ്രകാരം പത്ത് സെന്റ് സ്ഥലം മാഞ്ഞാലി പാലത്തിന് സമീപം വാങ്ങിയവരാണ് പുറമ്പോക്ക് സ്ഥലം കൂടി കൈയേറി 24 സെന്റാക്കി പുഴ അരികുവരെ മതില്‍ കെട്ടി കൈവശപ്പെടുത്തിയതെന്ന് നാട്ടുകാര്‍ പറയുന്നു.
കളമശേരി സ്വദേശികളാണ് ഇത്തരത്തില്‍ അനധികൃത കൈയേറ്റത്തിന് പിന്നിലെന്നും സമീപത്തെ സ്ഥലമുടമയും ഇതേ രീതിയില്‍ സ്ഥലം കൈവശപ്പെടുത്താന്‍ മതില്‍ നിര്‍മാണമാരംഭിച്ചിട്ടുതണ്ടെന്നും ഇവര്‍ ആരോപിക്കുന്നു. അനധികൃത കൈയേറ്റത്തിനെതിരേ നാട്ടുകാര്‍ ഫോര്‍ട്ട് കൊച്ചി ആര്‍.ഡി.ഒക്ക് പരാതി നല്‍കാന്‍ ഒപ്പുശേഖരണം നടത്തി വരികയാണ്. താലൂക്ക് സര്‍വേയറുടെ സന്നിധ്യത്തില്‍ റീസര്‍വെ നടത്തി കൈയേറ്റം നടത്തിയ സ്ഥലത്തെ മതില്‍ നീക്കം ചെയ്ത് പൊതുമുതല്‍ സംരക്ഷിക്കണമെന്നാണ് നാട്ടുകാരുടെ ആവശ്യം.