ആലപ്പുഴ: കേന്ദ്രസര്‍ക്കാര്‍ ആവിഷ്‌കരിച്ചിരിക്കുന്ന ദേശീയ ഗ്രാമിണതൊഴിലുറപ്പു പദ്ധതി ജില്ലയില്‍ തകിടം മറിഞ്ഞു. കുടിശികയിനത്തില്‍ ജില്ലയ്ക്ക് ഇതുവരെ കിട്ടാനുള്ളത് 5.76 കോടി രൂപ.
ജില്ലയില്‍ 1.66 ലക്ഷം കുടുബങ്ങളില്‍ നിന്നായി 1.85 ലക്ഷം തൊഴിലാളികളാണുള്ളത്. ഇതില്‍ 249 പേര്‍ക്കു മാത്രമാണ് നൂറ് ദിവസം തൊഴില്‍ ലഭിച്ചിട്ടുള്ളത്.
ഈ വര്‍ഷം 5,20,8288 ദിനങ്ങളിലായി 168 കോടി രൂപയാണ് ചെലവഴിച്ചിരിക്കുന്നത്. മാസങ്ങളോളമായി ജില്ലയിലെ വിവിധ ബ്ലോക്കുകളുടെ കീഴിലായി ലക്ഷക്കണക്കിനു തൊഴിലാളികളുടെ വേതനം മുടങ്ങിക്കിടക്കാന്‍ തുടങ്ങിയിട്ട്. അമ്പലപ്പുഴ ബ്ലോക്കില്‍ 70 ലക്ഷം, ആര്യാട് 19 ലക്ഷം, ഭരണിക്കാവ് 69 ലക്ഷം, ചമ്പക്കുളം 63 ലക്ഷം, ചെങ്ങന്നൂര്‍ 36 ലക്ഷം, ഹരിപ്പാട് 64 ലക്ഷം, കഞ്ഞിക്കുഴി 33 ലക്ഷം, മാവേലിക്കര 13 ലക്ഷം, മുതുകുളം 47 ലക്ഷം, പട്ടണക്കാട് 42 ലക്ഷം, തൈക്കാട്ടുശേരി നാല് ലക്ഷം, വെളിയനാട് എട്ട് ലക്ഷം എന്നിങ്ങനെയാണ് കുടിശിഖ വിതരണം ചെയ്യാനുള്ളത്.
ഇതിനെതിരെ വിവിധ സംഘടനകളുടെ നേതൃത്വത്തില്‍ പ്രക്ഷോഭ പരിപാടികള്‍ ആരംഭിച്ചിട്ടുണ്ട്.
തൊഴിലുറപ്പ് തൊഴിലാളി യൂനിയന്‍ (എ.ഐ.ടി.യു.സി) യുടെ ആഭിമുഖ്യത്തില്‍ 20ന് പാര്‍ലമെന്റ് മാര്‍ച്ച് സംഘടിപ്പിച്ചിട്ടുണ്ട്.