മാവേലിക്കര:താലൂക്ക് സഹകരണബാങ്കില്‍ കോടിക്കണക്കിന് രൂപയുടെ ക്രമക്കേട് നടത്തിയവരും അഴിമതികള്‍ക്കു കൂട്ടു നിന്നവരും രക്ഷപ്പെടാന്‍ പോകുന്നില്ലെന്ന് സി.പി.ഐ എം ജില്ലാ സെക്രട്ടറി സജി ചെറിയാന്‍.
മാവേലിക്കര താലൂക്ക് സഹകരണ ബാങ്കില്‍ നടന്ന കോടികളുടെ ക്രമക്കേടുകള്‍ക്കെതിരെ സിപിഎം നേതൃത്വത്തില്‍ നടന്ന രണ്ടാംഘട്ട സമരം മാവേലിക്കര കെഎസ്ആര്‍ടിസി ജങ്ഷനില്‍ ഉദ്്ഘാടനം ചെയ്തു സംസാരിക്കുകയായിരുന്നു അദ്ദേഹം.
തഴക്കര ശാഖയിലുണ്ടായ 28.23 കോടി രൂപയുടെ ക്രമക്കേട് മാത്രം അന്വേഷിച്ചാല്‍ പോരാ. ബാങ്കിന്റെ 10 ശാഖകളിലെ എല്ലാ മേഖലകളിലും സമഗ്രമായ പോലീസ് വിജിലന്‍സ് അന്വേഷണം അനിവാര്യമാണ്.ആലപ്പുഴ ജില്ലയില്‍ ക്രമക്കേട് കാട്ടിയിട്ടുള്ള 32 ബാങ്കുകളില്‍ ഒന്നുമാത്രമാണ് മാവേലിക്കര താലൂക്ക് സഹകരണ ബങ്കെന്നും ബാക്കി ഭൂരുഭാഗം ബാങ്കുകളും സിപിഎം ഭരണ സമിതിയിലുള്ളവയാണെന്നും സജി ചെറിയാന്‍ പറഞ്ഞു.
ജില്ലയിലെ ഏറ്റവും നല്ലതെന്ന് ഖ്യാദിയുള്ള ബാങ്കായിരുന്നു മാവേലിക്കര താലൂക്ക് സഹകരണ ബാങ്ക്. സഹകരണ ബാങ്കി ന്റെ ആഡിറ്റ് റിപ്പോര്‍ട്ടില്‍ ഒരു പ്രശ്‌നവും ഇന്നേവരെ ഉണ്ടായിട്ടുമില്ല.
ഇത്തരത്തില്‍ ആഡിറ്റ് നടത്തിയവര്‍ക്കെതിരെ അന്വേഷണം നടത്തണം. ക്രമക്കേട് നടന്ന ബാങ്കിലെ മാനേജറെ സസ്‌പെന്‍ഡ് ചെയ്തശേഷം സഹകരണ ബാങ്ക് ശാഖകളിലെ എല്ലാ കണക്കുകളും പരിശോധിക്കുകയും എല്ലാ വിഭാഗത്തിന്റെയും ചുമതലയുള്ള സെക്രട്ടറിയെയാണ് ബോര്‍ഡ് അന്വേഷണത്തിനായി ഏല്‍പ്പിച്ചത്. ഇത് തന്നെ അഴിമതിയുടെ ഉത്തമ ഉദാഹരണമാണ്.
കോശി അലക്‌സ് അധ്യക്ഷനായി. മാവേലിക്കര നഗരസഭാധ്യക്ഷ ലീലാ അഭിലാഷ്, ജി അജയകുമാര്‍, പി കെ ശശിധരന്‍, ബ്ലോക്ക് പ്രസിഡന്റ് കെ രഘുപ്രസാദ്, ഡി തുളസീദാസ് എന്നിവര്‍ സംസാരിച്ചു. ഏരിയാ സെക്രട്ടറി കെ മധുസൂദനന്‍ സ്വാഗതം പറഞ്ഞു.